Balla: Prokuroria të marrë në pyetje Bashën për oligarkët rusë
Kryetari i Grupit të PS- së, Taulant Balla, akuzoi dje kreun e PD- së, Lulzim Basha, se ka falsifikuar dokumentet e financimit të fushatës elektorale. Sipas Ballës, Basha ka prishur provat dhe ka kryer vepër penale. “Partia Demokratike ka shkelur ligjin për falsifikim të dokumenteve zyrtare, sepse në dokumentin e depozituar nuk rezulton të ketë deklaruar ashtu siç duhet. Të gjithë e dimë se në KQZ duhet të deklarojmë të gjitha shpenzimet që kemi bërë gjatë fushatës. Së dyti, jemi përpara një vepre tjetër penale, që janë çështje të mosdeklarimit. Edhe kjo është një çështje tjetër, që ngarkon me përgjegjësi përsëri z. Lulzim Basha, sikurse prishjen e provave apo të elementëve që përbëjnë një vepër penale. Kjo për shkak se në dokumentet zyrtare konstatohet mospërputhshmëri të të gjitha këtyre deklarimeve. Të gjendur përpara kësaj situate, për t’iu përgjig- jur në mënyrë korrekte pyetjes suaj, jemi përsëri këtu për t’i bërë thirrje Partisë Demokratike, kryetarit të saj Lulzim Basha, i cili në fakt është personi drejtpërsëdrejti përgjegjës po të kemi parasysh se ai është firmëtari”, tha dje Balla. Sekretari i Përgjithshëm i PS- së, i bëri thirrje Prokurorisë që të marrë në pyetje kryetarin e opozitës për të sqaruar financimin e dyshimtë nga Rusia. “Jemi përpara faktit ku së pari duhet bërë një sqarim publik, sepse në fund të fundit në xhepa oligarkësh rusë, tashmë të konfirmuar sepse ata janë pronarë të “Biniada Trade LP”, janë bërë pagesa në interes edhe në emër të Partisë Demokratike përkundrejt Nick Muzin, lobuesit amerikan. Shqetësimi im, në emër të Grupit Parlamentar të Partisë Socialiste, është i qartë: Prokuroria nuk duhet të vonojë për asnjë moment thirrjen dhe marrjen në pyetje të Lulzim Bashës për të sqaruar gjithë këtë skemë financimi të paligjshëm. Më pas, të jeni të sigurt që ne do të ndërmarrim edhe nisma ligjore për sa i përket rritjes së transparencës së financimeve për partitë politike, që është një prej detyrimeve kryesore edhe në kuadër të Reformës Zgjedhore”, tha dje Balla.