Ahmetaj: Ekonomia po konsolidohet, Basha s’di të lexojë shifrat e FMN- së
Ministri i Financave dhe Ekonomisë, Arben Ahmetaj, e cilësoi raportin e Fondit Monetar Ndërkombëtar serioz, ku evidentohen arritjet për konsolidimin e rritjes ekonomike. Kreu i Financave, Ahmetaj, deklaratën e kryetarit të Partisë Demokratike Lulzim Basha e cilësoi si paaftësi të opozitës për ta lexuar siç duhet raportin. “Që Lulzim Basha nuk e njeh mjaftueshëm as tabelën e shumëzimit, ky është fakt botërisht i njohur! Që Lulzim Basha ngatërrohet edhe kur flet për paratë e partisë së tij, këtë e tregoi më së miri numri i shpjegimeve kontradiktore që dha publikisht për financimet ruse të fushatës së tij kundër Shqipërisë nëpër botë! Po që Kryetari i Opozitës ta lexojë publikisht raportin e FMN- së, si një analfabet që nuk ndjek dot as fillin e abetares, kjo shkon përtej Lulzimit si simbol paaftësie individuale e budallallëku politik dhe rëndon qenësisht vetë institucionin e opozitës! Dhe ky është tanimë një problem i madh shoqëror, jo thjesht një boshllëk i madh politik në shoqëri. Raporti i FMN- së është shumë serioz për një qenie kaq joserioze sa c’është opozita sot. Në raport janë të qarta arritjet e padiskutueshme dhe sfidat e pamohueshme të ekonomisë së Shqipërisë sot, e cila rritet në mënyrë të qëndrueshme dhe nuk ka lidhje as me fjalën “krizë” e as me fjalë të tjera të përdorura rëndom në fletërrufetë e përditshme të Partisë Demokratike e të kryetarit të saj”, u shpreh ministri Ahmetaj. Ministri i Financave, Ahmetaj, u është përgjigjur pozitivisht edhe rekomandimeve të FMN- së për ofertat e pakërkuara të projekteve me partneritet publik- privat.