Meta: BE të hapë sa më shpejt negociatat me Shqipërinë

Presidenti i Republikës, Ilir Meta, kërkoi dje hapjen sa më shpejt të negociatave për anëtarësim me Shqipërinë. Kreu i shtetit priti dje në një takim Komitetin e Çështjeve Politike dhe të Sigurisë së Këshillit të BE- së, të përbërë nga ambasadorë të vendeve anëtare të Bashkimit Europian. “Presidenti i Republikës ripërsëriti kërkesën unanime në emër të të gjithë aktorëve institucionalë dhe politikë në vend, drejtuar vendeve anëtare të Bashkimit Europian për hapjen sa më parë të negociatave të anëtarësimit, duke siguruar për vazhdimin e reformave në 5 prioritetet kyçe”, thuhet në njoftimin për shtyp të Presidencës për takimin. Për kreun e shtetit, politikat e sigurisë së Shqipërisë janë të koordinuara mirë me ato të BE- së. “Presidenti Meta theksoi se politika e jashtme dhe e sigurisë së Shqipërisë është plotësisht e harmonizuar me Bashkimin Europian dhe se e konsideron shumë të rëndësishëm bashkëpunimin operacional dhe strategjik ndërmjet BE- së dhe Ballkanit Perëndimor në përballjen me sfidat dhe rreziqet e sigurisë”, thuhet në njoftimin e Presidencës. Gjithashtu, Presidenti Meta vuri në dukje rolin konstruktiv të Shqipërisë në kuadër të bashkëpunimit rajonal dy dhe shumëpalësh, duke çmuar se ky është një kontribut i drejtpërdrejtë për të ardhmen europiane të vendit dhe të të gjithë rajonit.