Prokuroria mbyll hetimet, ish- deputeti Shkëlqim Selami nën akuzë për falsifikim
Ish- deputeti i LSI- së dhe i PSsë në Qarkun e Vlorës, Shkëlqim Selami, do të dalë para Gjykatës së Tiranës, pasi akuzohet për falsifikim të vulave, stampave dhe formularëve” nga Prokuroria e Tiranës. Kjo e fundit ka mbyllur hetimet për ish- deputetin, i cili ka fshehur një masë sigurie nga Gjykata e Brindisit në formularët e vetëdeklarimit në kuadër të dekriminalizimit. Sipas dosjes së Prokurorisë së Tiranës, ndaj Selamit ka pasur një masë sigurie “arrest me burg” nga Gjykata e Brindisit në vitin 1994 për pjesëmarrje në organizatë kriminale. Por kjo masë është shuar kur ishdeputeti u arrestua në Itali në vitin 2006 dhe në vitin 2007 Gjykata italiane vendosi shuarjen e veprës penale për shkak të parashkrimit. Mirëpo, Selami, edhe pse ka pasur dijeni për hetimet ndaj tij dhe për masën, e ka fshehur atë duke mos e deklaruar në formularin që ka plotësuar pasi është zgjedhur deputet i Kuvendit të Shqipërisë. Kujtojmë se Shkëlqim Selamit iu hoq mandati pikërisht nga KQZ- ja në kuadër të dekriminalizimit. “I pandehuri, në cilësinë e deputetit të Republikës së Shqipërisë, ka qenë i detyruar të plotësojë “Formularin e vetëdklarimit”, me anë të të cilit duhet të deklaronte ekzistencën ose jo të shkaqeve për të kandiduar, për të mos u zgjedhur ose emëruar në poste publike. Nga këqyrja e formularit të vetëdeklarimit të të pandehurit, vihet re se ky shtetas i është përgjigjur me “JO” pyetjes nëse ndaj tij është caktuar ndonjëherë ndonjë masë shtrënguese e sigurisë personale në fuqi ose jo”, shkruan dosja e Prokurorisë së Tiranës. Mirëpo, Prokuroria e Tiranës dërgoi një letërporosi në Itali për Selamin dhe përgjigja e italianëve ishte e ndryshme nga ajo çfarë ka deklaruar Selami. Sipas letërporosisë, Shkelqim Selami është arrestuar në vitin 2006 në ekzekutim të masës së sigurimit “arrest me burg”, lëshuar nga Gjykata e Brindisit në vitin 1994, për veprën penale të pjesëmarrjes në organizatë kriminale me qëllim emigracionin klandestin. Por masa e sigurisë është hequr më 6.9.2006 dhe në shkurt të vitit 2007, Gjykata e Brindisit ka dhënë vendim për shuarjen e veprës penale për arsye parashkrimi.