Arrestohet në Rinas biznesmeni që "privatizoi" malin në Shëngjin

Biznesmeni 47- vjeçar që ishte shpallur në kërkim nga Policia gjatë operacionit "Ranishtja 4", gjatë të cilit u arrestuan 12 zyrtarë, është arrestuar dje në afërsi të Rinasit. Lek Frroku dyshohet se është një nga personat kryesorë që ka kryer tjetërsimin e pronave në Shëngjin, Mali i Rencit dhe "Rana e Hedhun". Burime nga Policia thanë se pas tjetërsimit të pjesës më të madhe të sipërfaqes prej 234 mijë metër katrorë në Malin e Shëngjinit, Malin e Rencit dhe te "Rana e Hedhun", fshihej biznesmeni nga Lezha, Lek Frroku. Babai i tij, Frrok Frroku, u ndalua gjatë operacionit "Ranishtja 4" ditën e premte, pasi ndaj tij kishte një masë sigurie "arrest shtëpie". Ndërsa, për të birin Gjykata e Lezhës vendosur "arrest me burg", masë që u ekzekutua dje në Rinas. Deri dje, Lek Frroku vijonte të ishte person në kërkim nga ana e Policisë së Shtetit, bashkë me 10 persona, për të cilët po ashtu është vendosur masa "arrest me burg". Burime nga grupi hetimor thanë se biznesmeni i shpallur në kërkim kishte rolin kryesor në tjetërsimin e pronave në bregdet, pasi dyshohet të ketë kryer të gjitha procedurat. Ndërsa, pjesa më e madhe e sipërfaqes së përfituar në këtë formë, ka kaluar në pronësi të të afërmve të tij. Deri tani ishin arrestuar dhe ndaluar 12 zyr- tarë publikë dhe janë shpallur në kërkim 11 zyrtarë e shtetas të tjerë, të cilët në bashkëpunim me njëri- tjetrin, duke abuzuar me detyrën kanë falsifikuar, tjetërsuar dhe përvetësuar 234,548 m2 tokë shtetërore ranishte në zonën bregdetare Shëngjin, te vendi i quajtur "Rana e Hedhun". Mes të arrestuarve ishte edhe kryetari i Bashkisë së Lezhës, Fran Frrokaj. Policia tha të premten se kjo sipërfaqe është shndërruar me dokumente të falsifikuara nga tokë shtetërore në bregdet, në tokë arë dhe pemëtore. Më pas, është regjistruar në Zyrën e Regjistrimit të Pasurisë së Paluajtshme Lezhë, duke përfituar padrejtësisht në interes të tyre dhe personave të tjerë. Këto hetime proaktive janë kryer në funksion të procedimit penal, regjistruar në vitin 2017, për veprat penale të "Shpërdorimit të detyrës" dhe "Falsifikimi i dokumenteve". Lek Frroku, 47 vjeç, ka në pronësi kompaninë "Kentak" me qendër në Lezhë, që ka si objekt veprimtarie dhjetëra shërbime. Sipas ekstraktit të QKB- së, kjo shoqëri kryen shërbime të transmetimeve radiotelevizive dhe median e shkruar dhe shërbimeve të tjera mbështetëse.