Zaev i përgjigjet Moskës për anëtarësimin në NATO
Kryeministri i Republikës së Maqedonisë ka reaguar të mërkurën pas paralajmërimeve nga Moska, për “pasoja negative për sigurinë rajonale” si dhe për marrëdhëniet bilaterale Rusi – Maqedoni, nëse vendi i tij hyn në NATO. Zëvendësministri i Jashtëm rus, Aleksandar Grushko, në një takim me ambasadorin e Maqedonisë në Rusi, Goce Karajanov, ka theksuar se planet e Maqedonisë për integrim në NATO dhe BE mundet të kenë pasoja negative në sigurinë rajonale, por edhe në çështjet bilaterale. Kryeministri maqedonas, Zoran Zaev, i është përgjigjur Rusisë se Maqedonia, që prej pavarësisë së vet, ishte fuqishëm e përcaktuar për anëtarësim në NATO. “Maqedonia, qysh prej pavarësisë në vitet ’ 90, është e përcaktuar fuqishëm për anëtarësim në NATO dhe e ka përkrahjen e plotë të qytetarëve maqedonas. Zgjedhja jonë me vendosmëri të qartë është për integrimet euroatlantike”, ka deklaruar Zaev.