Gavazaj: Kombëtarja zgjedhje zemre, te Shqipëria me bindje
Lojtari i Skënderbeut, Enis Gavazaj, mori ftesën e parë nga Kombëtarja e Shqipërisë, pas një eksperience në grumbullimin me ekipet e moshave. Ai po zhvillon një sezon të mirë te skuadra e Skënderbeut dhe kjo ka bindur trajnerin italian t'i bëjë ftesë. Si gjithë të tjerët, Gavazaj ka në dispozicion gjashtë ditë për t'i bërë përshtypje italianit që ta ketë në konsideratë.
Thirrja - "Ishte dhurata më e bukur dhe ndër arritjet e mia më të mëdha thirrja nga Kombëtarja. Kisha emocione që ishte thirrja e parë nga Kombëtarja A, pasi kam qenë me moshat. Por të jesh pjesë e ekipit të parë është një emocion i papërshkueshëm".
Ndeshjet - "Ne do të japim maksimumin dhe të jemi afër ekipit. Ne duhet të mbështesim trajnerin dhe të tregojmë vlerat tona. Atmosfera është shumë e mirë, pasi kam gjetur dhe disa miq që kam pasur".
Konkurrenca - "Ne duhet të tregojmë veten në stërvitje. Mendoj se vendos trajneri se kush duhet të luajë. Aq minuta sa do të jemi në fushë do të japim maksimumin".
Kosova - "Kam pasur 2- 3 ftesa nga Kosova, por kam menduar gjithmonë për Shqipërinë. Jam këtu ku jam, pasi kam zgjedhur me dëshirën dhe zemrën time".