Specializimet te Mjekësia, rriten shanset për kandidatët
Mbyllen aplikimet, 330 studentë në garë për 247 kuota
Vitin e kaluar kishte më shumë kuota se kandidatë për specializantë, ndërsa sivjet raporti është përmirësuar lehtë. Gjasat që një student i diplomuar në Universitetin e Mjekësisë të specializohet, mbeten të mëdha. Një ditë më parë u mbyll faza e aplikimeve, nga ku rezultojnë 334 kandidatë në garë për 247 kuotat e shpallura, sipas specialiteteve të ndryshme ( sipas tabelës përbri). Pezullimi i kuotave për disa vite dhe “hemorragjia” e mjekëve jashtë vendit ka bërë që Ministria e Shëndetësisë të miratojë çdo vit gjithnjë e më tepër kuota. Vitin e ardhshëm pritet të diplomohen mbi 200 specialistë, të cilët do të mbulojnë mangësitë në spitale, veçanërisht ato në rrethe.
Në faqen zyrtare të Fakultetit të Mjekësisë është publikuar lista emërore me kandidatët të cilët plotësojnë kriteret për të marrë pjesë në konkursin me gojë dhe atë të informatizuar. Përzgjedhja e listave e studentëve të ndarë, sipas datave përkatëse të zhvillimit të intervistës me gojë dhe në vijim të testimit që do të zhvillohet në formë dixhitale, ashtu si vitin e kaluar, edhe sivjet do t’i lihet në dorë rastësisë, duke u përcaktuar me short. Për këtë proces do të ketë një monitorim nga Komisioni i Vlerësimit, i cili ngrihet posaçërisht. Testimit të parë, atij me gojë, kandidatët do t’i nënshtrohen pas gati dy javësh, në datën 4 prill. Ndërsa për provimin dixhital nuk ka ende një datë të saktë. Peshën më të madhe për cak- timin e fituesve e përmban testi i informatizuar, ndërsa provimi me gojë do të ketë vetëm 5%, nga 10 që ka pasur vitet e kaluara. Mesatarja tashmë do të ketë peshë më të madhe, nga 20 në 25%. Në përfundim të testimit të të gjithë kandidatëve, Komisioni i Vlerësimit përgatit listën përmbledhëse të tre treguesv, e duke renditur kandidatët sipas pikëve në rend zbritës. Sakaq, brenda dy ditëve, kandidatët do të mund të zgjedhin programin e specializimit afatgjatë, sipas kuotave të miratuara e pasqyruar në tabelën përbri shkrimit.