RIHAPEN APLIKIMET
Skema e re, si do jepen kreditë e buta për shtëpi
Zbardhet vendimi i Këshillit Bashkiak, që rihap aplikimet për të përfituar shtëpi me kredi të butë në Tiranë. Kriteret e formulari që duhet plotësuar
Hapet drita jeshile për të gjitha familjet e pastreha të Tiranës, të cilat nuk kanë mundësi të blejnë një apartament në kushtet e tregut të lirë.
Këshilli bashkiak i Tiranës do të miratojë të enjten e javës që vjen në Këshillin bashkiak udhëzuesin operacional për ndarjen e kredive të buta. Nisur nga problematikat e hasura vitin e kaluar, Komisioni i Shërbimit Social ka vendosur të ndryshojë skemën e ndarjes së kredive dhe kufijtë minimalë e maksimalë të të ardhurave, që duhet të plotësojnë aplikuesit. Në të parin vit të zbatimit të programit nga ana e bashkisë, u vunë re tri problematika. Së pari, mosha e përfituesve. Disa prej tyre rezultuan në moshë të madhe, duke penguar klasifikimin për kredi, pasi cenojnë kushtin kur klienti duhet të jetë 65 vjeç në këstin e fundit. Së dyti, afati i subvencionimit prej 15 vitesh rezultoi të jetë penalizues, pasi kësti ishte shumë i lartë për disa familje me të ardhura të ulëta. Së treti, disa prej familjeve kanë pasur të ardhura të përkohshme, të cilat vinin nga punësimi, pensioni i pleqërisë apo ai i invaliditetit. Nisur nga arsyet e mësipërme, bashkia ka vendosur të rishikojë formulën që hartoi vjet, për të bërë thirrjen e dytë për aplikim për shpalljen e 477 përfituesve të raundit të dytë. Sakaq, skema e re vlen edhe për ata që aplikojnë për herë të parë.
KRITERET E PËRZGJEDHJES Përveç të ardhurave minimale e maksimale që duhet të plotësojnë aplikantët, janë pesë tregues që do të shërbejnë për komisionin si kritere apriori për të bërë përzgjedhjen finale. Kështu, përfitues potencialë në programin “Subvencionimi i interesave të kredisë për familjet e reja” do të jenë famil- jet që kanë në përbërje një çift të ri, mosha e përbashkët e të cilëve nuk i kalon të shtatëdhjetat; ato familje të reja që kanë në ngarkim persona me aftësi të kufizuar apo persona në pension; familjet që kanë të ardhura sipas limitit të përcaktuar në këtë program; ato që nuk janë dhe nuk kanë qenë përfitues të programeve të tilla të ngjashme më parë dhe sigurisht nuk kanë në pronësi një banesë.