Shkodër, Basha: Kriminale që nuk shpallet emergjenca
“Vepër penale, çdo pasojë në jetët dhe shëndetin e banorëve”
Kryetari i Partisë Demokratike, Lulzim Basha, e cilësoi kriminale mosshpalljen e gjendjes së emergjencës në Bashkinë e Shkodrës dhe të Vaut të Dejës nga ana e Kryeministrit.
Basha ishte dje në Bashkinë e Shkodrës, ku u takua me banorët e zonave të përmbytura. “Situata nuk po shkon drejt përmirësimit, por përkeqësimit të thellë. Ndaj, dhe arsyeja kryesore është t’u vihet në ndihmë me të gjitha mjetet dhe mënyrat banorëve të kërcënuar. Do të thotë se mosshpallja e emergjencës është përgjegjësi ligjore dhe penale dhe çdo pasojë në jetën dhe shëndetin e banorëve të Bashkisë së Shkodrës dhe Vaut të Dejës, është konsekuencë e mosveprimit, vepër penale, kriminale, mosshpallja e emergjencës. Ndihmat e ardhura nga qeveria janë të pamjaftueshme. Puna e bërë deri tani është nga Bash- kia e Shkodrës që, si asnjë bashki tjetër, nuk është përgatitur ta përballojë këtë gjendje emergjence e vetme. Kjo është arsyeja pse insistohet prej më shumë se dy javësh me shpalljen e gjendjes së emergjencës”, tha Basha gjatë takimit me banorët. Ai i kërkoi Kryeministrit që të veprojë dhe të mos heshtë përpara kësaj situate që vjen duke u zgjeruar. “Dua t’i drejtoj një apel Kryeministrit, shpalle menjëherë gjendjen e emergjencës. T’i japë fund heshtjes fajtore të KESH- it dhe të ministrit të KESH- it, Damian Gjiknuri, heshtjes bashkëfajtore të Kryeministrit dhe të autoriteteve të tjera, përballë përmbytjeve në Shkodër. Të shpallet menjëherë gjendja e emergjencës!”, tha kreu demokrat. Ai vlerësoi punën e punonjësve të pushtetit vendor, por dhe të Forcave të Armatosura për ndihmën e vazhdueshme që kanë dhënë. “Zonja kryetare e bashkisë, i gjithë aparati i emergjencës, zonja kryetare e qarkut, deputetë, z. kryetar i Partisë Demokratike të Shkodrës dhe të gjithë vullnetarët, të cilët me përpjekjet e tyre gjatë këtyre 18 ditëve kanë bërë akoma më shumë sesa institucionet e tjera që e kanë për detyrë të ndihmojnë në raste të tilla. Dua të falënderoj pa dyshim edhe personelin e forcave të ushtrisë së Forcave të Armatosura dhe këdo tjetër, që është bërë pjesë e kësaj përpjekje”, tha Basha.