Xhafaj në SHBA, takohet me drejtues të DEA- s
Në Departamentin e Shtetit përgëzohet Reforma në Drejtësi
Në ditën e dytë të vizitës zyrtare në Amerikë, ministri i Brendshëm, Fatmir Xhafaj, zhvilloi një takim me zëvendësdrejtorin e DEA- s, Anthony Williams, dhe ekipin e tij të Drejtorisë Operacionale. Pasi bëri një prezantim të arritjeve në luftën kundër kultivimit të kanabisit, shpjegoi edhe punën e madhe të bërë nga strukturat e qeverisë dhe veçanërisht Policia e Shtetit, për të sensibilizuar fermerët dhe shoqërinë në tërësi për pasojat negative që vijnë nga kultivimi i kanabisit. Ministri kërkoi të rritet kapaciteti i Zyrës Rajonale të DEA- s në Athinë, duke pasur një oficer të dedikuar për Shqipërinë apo përmes intensifikimit të takimeve dhe operacioneve të përbashkëta mes Policisë shqiptare dhe Zyrës Rajonale të DEA- s në Greqi. Më tej, drejtuesve të Agjencisë amerikane iu paraqit një përmbledhje e punës së bërë në kuadër të operacionit “Forca e Ligjit”, identifikimit dhe analizës së grupeve kriminale në fushën e trafikut të drogës, hetimeve ndaj veprimtarisë dhe aseteve të tyre kriminale. Zv. drejtori i DEAs dhe drejtori i Operacioneve, Williams, u shpreh se plani i veprimit dhe vetë operacioni “Forca e Ligjit” është plani më i mirë i prezantuar ndonjëherë nga partnerët tanë të përbashkët në luftën ndaj trafikut të drogës”. Gjithashtu, përgëzoi Policinë shqiptare për rezultatet mbresëlënëse të këtij viti, lidhur me sekuestrimin e kokainës dhe heroinës në territorin shqiptar, duke i kon- sideruar ato një sukses të merituar të organeve ligjzbatuese shqiptare. Më tej, Xhafaj zhvilloi edhe një takim në Departamentin e Shtetit, ku u prit nga Matthew Palmer, i ngarkuar me detyrën e zv. ndihmësit të Sekretarit të Shtetit për Europën dhe EuroAzinë. Palmer vlerësoi progresin e jashtëzakonshëm sa i takon Reformës në Drejtësi, rezultatet e para të së cilës ai i konsideroi vërtet inkurajuese. Xhafaj informoi mbi procesin e ristrukturimit në Policinë e Shtetit, veçanërisht ato që kanë të bëjnë me vetingun, proces që u vlerësua nga Palmer, pasi sipas tij ky proces reformash është shumë i rëndësishëm. Takimi i radhës në Departamentin e Shtetit ishte me Zëvendëskoordinatoren për Antiterrorizmin, Alina Romanowski, dhe nënshkrimi i marrëveshjes me të. Ai u fokusua në përpjekjet e Shqipërisë lidhur me parandalimin e fenomenit të radikalizmit dhe ekstremizmit të dhunshëm si dhe forcimin e luftës kundër terrorizmit.