Flamur Noka: Alket Hyseni, nën akuzë publike
“Bleu 11 mijë m2 tokë me falsifikim, ia kaloi mikut të Ramës”
Partia Demokratike akuzoi dje deputetin socialist Alket Hyseni, si të vënë nën akuzë publike, se i ka vjedhur 11 mijë metra katrorë tokë në Dhërmi familjes Bua. “Deputeti i Partisë Socialiste, Alket Hyseni, është sot i akuzuar publikisht se ka vjedhur 11 mijë metra katrorë tokë në Dhërmi nga familja Bua. Denoncimi publik u bë në emisionin “Të Paekspozuarit”, ku zonja Irini Bua akuzon deputetin e Edi Ramës për tjetërsimin e pronës së saj, nëpërmjet falsifikimit. Pasi ka blerë 11 mijë metra katrorë tokë me dokumente të falsifikuara, Alket Hyseni ia kaloi atë mikut të Edi Ramës, Gon Papulit. Ku i gjeti milionat një nëpunës shteti, ish- doganieri Alket Hyseni, për të blerë 11 mijë metra katrorë tokë në Dhërmi apo të tjera në Tiranë?”, tha nënkryetari i Komisionit të Sigurisë, Flamur Noka. Partia Demokratike akuzon se në këtë aferë është pjesë edhe Kryeministri Rama, i cili sipas deputetit Noka hesht. “Çfarë e bën edhe më të rëndë grabitjen e pronës nga familja Bua tek Alket Hyseni dhe më pas te miku i Kryeministrit, është fakti se ai e ka kryer transaksionin në kohën kur Edi Rama e kishte emëruar kryetar të Task- Forcës për verifikimin e kthimit dhe regjistrimit të pronave në bregdetin e jugut. Në këtë histori, ka edhe një fakt tjetër shumë të rëndë. Kur po bëhen 24 orë nga denoncimi publik i zonjës Irini Bua, Edi Rama hesht. Kryeministri që bërtet për drejtësi dhe që ka ngritur një task- force të re me “alketë” të tjerë për grabitjen e re të pronave në bregdet, duhet t’u përgjigjet disa pyetjeve!”, deklaroi Noka. Ai ka ngritur disa pikëpyetje që kërkojnë përgjigje. “Pse i ka dhënë mikut Gon Papuli, leje ndërtimi për një fshat turistik mbi një pronë të vjedhur nga deputeti Alket Hyseni? Sa pro- na të tilla janë grabitur me lejen e Kryeministrit Edi Rama? Kush janë klientët që do të marrin pronat e grabitura nga skema e re mafioze e qeverisë, që u heq pronarëve të drejtën e pronës?”, pyeti dje Noka. Deputeti demokrat i kërkoi Prokurorisë të mos heshtë, por të nisë çështjen hetimore. “Bashkë me Edi Ramën, hesht edhe Prokuroria. Deri tani, Prokuroria nuk ka ndërmarrë asnjë veprim për të hetuar këtë peshk të madh që i ka rënë në rrjetë. Partia Demokratike beson se ky është një rast që Prokuroria të mos tregohet selektive dhe të bëhet pjesë e axhendës politike të palës që është në pushtet”, tha Noka.