Manja: Basha ka kryer gjashtë vepra penale, të hetohet
Kryetari i Komisionit të Ligjeve, Ulsi Manja, akuzoi kreun demokrat Lulzim Basha, se me financimet ruse ka kryer gjashtë vepra penale. “Me veprimet e tij të papërgjegjshme, Lulzim Basha ka kryer jo një, as dy, por plot gjashtë vepra penale”. “Basha duhet të hetohet për fshehjen e të ardhurave, një vepër penale e parashikuar nga neni 180/ 3 i Kodit Penal, një vepër e dënueshme deri në tre vjet heqje lirie”, tha Manja. Po ashtu, sipas tij, Basha duhet të hetohet për falsifikimin e dokumenteve zyrtare, një vepër penale e parashikuar nga neni 186/ 3 i Kodit Penal dhe e dënueshme deri në shtatë vjet heqje lirie. “Basha duhet të hetohet për akuzën e korrupsionin aktiv të nëpunësve të huaj publikë, një vepër penale e parashikuar nga neni 244/ a e Kodit Penal dhe e dënueshme deri në tre vjet heqje lirie. Basha duhet të ndiqet penalisht për akuzën e pastrimit të produkteve të veprës penale të parashikuar nga neni 287, paragrafi i tretë i Kodit Penal, e dënueshme deri në dhjetë vjet heqje lirie”, vijoi Manja. Gjithashtu, sipas tij, Kreu i PD- së duhet të ndiqet penalisht për akuzën e çeljes së llogarive anonime, parashikuar nga neni 287/ a dhe për përvetësimin e parave ose mallrave që rrjedhin nga vepra penale ose veprimtari kriminale, parashikuar nga neni 287/ b; edhe këto vepra të dënueshme me burgim. “Të gjitha këto akuza, Partia Demokratike dhe Lulzim Basha i kanë marrë lehtë, të bindur se mund të mbrohen politikisht, pavarësisht se kanë shkelur ligjin me të dyja këmbët”, tha Manja. Ai tha se “është koha që Lulzim Basha të bëjë transparencë në lidhje me aferën e parave ruse të lobimit dhe mashtrimin në deklaratat e KQZ- së, ka kaluar”.