Apeli lë në burg stomatologen, avokati: Paratë s’kanë ekzistuar
DURRES - Gjykata e Apelit ka lënë në arrest me burg stomatologen Olesia Duka, deri në përfundim të hetimeve që Prokuroria ka nisur për mashtrimin e të paktën 12 personave me shuma të mëdha parash. 38- vjeçarja u la në burg, pavarësisht pretendimeve të avokatit se klientja e tij është e pafajshme dhe se duhet një masë tjetër shtrënguese. Pala mbrojtëse i solli në vëmendje trupit gjykues të merrte parasysh faktin se duhet të hetoheshin kallëzuesit, pasi, sipas tyre, paratë e pretenduara nuk kanë ekzistuar kurrë. “Të nderuar, kemi verifikuar bilancet e katër viteve të fundit të kallëzuesve dhe paratë që ata pretendojnë se ia kanë dhënë klientes sime, nuk rezultojnë kurrkund. Nga dolën këto para që ata pretendojnë?! Pra, në këtë rast, mashtrues dalin ata dhe jo znj. Duka, e mbrojtur prej meje. Organi i akuzës nuk ka kryer asnjë verifikim mbi burimin e këtyre parave inekzistente, por është mjaftuar vetëm me kallëzimet e këtyre personave që pretendojnë se janë mashtruar nga Duka. Këtu nuk bëhet fjalë për mashtrim, por për vepra të ndryshme penale në ngarkim të kallëzuesve. Ju lutem, merreni parasysh këtë fakt dhe jepini mundësi klientes sime të hetohet në arrest shtëpie ose monitorim elektronik”, theksoi avokati i Dukës, Arben Llangozi. Sipas organit të akuzës, i përfaqësuar nga prokurori Ferdinand Elezi, 38- vjeçarja nuk ka justifikuar deri tani që pasuritë e saj të jenë krijuar me burime të ligjshme, duke lënë të kuptohet se pasuria e saj është zhvilluar në mënyrë të paligjshme nëpërmjet mashtrimeve. Elezi theksoi se priten denoncime nga persona të tjerë të mashtruar nga Olesia Duka. “Pritet që krahas 12 kallëzimeve, në drejtim të Dukës të këtë denoncime të tjera për të njëjtën vepër penale, atë të mashtrimit me shuma të mëdha parash. Për shkak se jemi para rrezikut të mbledhjes e verifikimit të provave të administruara, masa e përshtatshme është: arrest me burg. Kërkojmë që Gjykata të lërë në fuqi vendimin e Gjykatës së Shkallës së Parë. Kërkojmë që ajo të qëndrojë në arrest në burg, pasi mund të ndikojë në dëmtimin e hetimit”, tha prokurori Elezi. Vetë stomatologia nuk ishte e pranishme në rivlerësimin e masës së sigurisë, ndërsa avokati i saj theksoi se do ta çojë çështjen në Gjykatën e Lartë. Dentistja 38- vjeçare akuzohet se ka mashtruar disa persona, kryesisht në Tiranë e Durrës. Sipas hetimeve, deri më tani janë të paktën 12 persona, të cilët kanë depozituar kallëzime në emër të saj për mashtrime në shuma të mëdha.