“Basha, kopje e Berishës për spastrimin e radhëve të partisë, nuk është profesional”
Ish- themeluesi i PD- së, Neritan Ceka, nuk e sheh si opsion rikthimin e Sali Berishës në krye të demokratëve për të mundësuar fitoren në zgjedhje. Sipas Cekës, do të ishte ahistorike nëse do të ndodhte, pasi edhe rasti i rikthimit të Berluskonit në Itali tregon se sa herë që lideri rikthehet, partia humbet. Ceka flet edhe për drejtimin e PDsë nga Basha, duke kujtuar se ky i fundit është treguar edhe më autoritar se Berisha për spastrimin e partisë nga zërat kundër. “Është ahistorike. Nuk ndodh. Unë e kam përshëndetur dorëheqjen e Berishës, siç e bëri si akt fillimisht Nano dhe e mbajti deri në fund. Modelin e rikthimit të liderit e patë në rastin e Berluskonit. Sa herë kthehet lideri, nuk fiton më. PD sot duhet të jetë një parti kontestuese. Nuk është çështje lidershipi. Nuk është çështja se Basha është më pak karizmatik se Berisha. Sepse, në fakt, Basha është një kopje e Berishës në atë që ka bërë me spastrimin e radhëve të partisë. Madje, Berisha ka qenë më i hapur, fitoren e arriti duke i mbledhur njerëzit dhe jo duke i larguar. Mendoj, se Basha në Parlament nuk është profesional. Mendoj se PD nuk ka më kualitete, është dil- etante në pjesën më të madhe të komisioneve”, deklaroi Ceka. Ish- anëtari i PD- së thekson se Basha është një lider i kontestueshëm lehtë për shkak se zgjedh të drejtojë forcën politike më mënyra që nuk i vijnë për shtat partive të djathta. “Shohim përsëri një lider që del nga mitingu në miting në mënyrë të ngjashme me atë të PS- së, që e ka në natyrën e saj. PD është një kopje e Partisë së Punës, që del gjithmonë me udhëheqësin. Është një lider që mund të kontestohet shumë kollaj, kontestohet nga pantallonat e dokut, nga bluza që mban dhe jo nga ato që prezanton përpara publikut. Përjashtohet një lidership profesional. Unë do them një model që duhet ndjekur dhe kjo është znj. Tabaku. Pavarësisht se është në PD, nuk e kam për këtë, por është një model dhe do të thosha, se në vend që të vinte Berisha në krye të PD, pse s’merrni Tabakun? Ajo nuk është një politikane e re. Është e bukur, simpatike, a ku di unë, por nuk është e re në politikë. Ka përvojë. Nuk dua t’i them PD- së, ja ku e keni lideren, por dua të them kategorinë e demokratëve që mund të promovohen”, tha Ceka.