Festë me kokainë, pranga 27- vjeçares dhe pronarëve të lokalit
FIER - Tri persona janë vënë në pranga në qytetin e Fierit, me akuzën e shpërndarjes së drogave të forta pas një operacioni antidrogë të koduar “Mesnata”. Gjatë operacionit janë sekuestruar 36 doza kokainë, ndërsa në pranga u vunë Shkëlzen Gjata, 24 vjeç, banues në Drizë, Fier, Mariglen ( Renato) Mellaraj, 35 vjeç dhe Pranvera Isufaj, 27 vjeçe banuese në Fier. Operacioni për arrestimin e tyre erdhi pasi Policia kishte siguruar informacion se, në lokalin “New York” në lagjen “Apollonia”, gjatë një feste që do të organizohej mbrëmjen e së premtes, do të shitej dhe drogë. Me marrjen e këtij informacioni, gjatë mesnatës u bë ndërhyrja në lokalin në fjalë nga forcat e FNSH- së. Nga ushtrimi i kontrollit të personave dhe ambienteve të këtij lokali që ishte në administrim nga Shkëlzen Gjata dhe Mariglen Mellaraj, në një dhomë me mbishkrimin “Private”, u gjendën 36 copë paketime ( porcione) me lëndë të dyshuar kokainë, një peshore elektronike, një palë gërshërë, një fletore shënimesh etj..
Gjatë kohës së kontrollit fizik të personave që ishin në këtë lokal dhe më konkretisht të Pranvera Isufaj, në çantën e saj të krahut i janë gjetur dhe sekuestruar dy thika me teh të përkulshëm. Gjatë aksionit, 27- vjeçarja ka kundërshtuar hapur veprimet e Policisë, duke përdorur dhe forcën me veprime aktive e për pasojë ka penguar në kryerjen e detyrës punonjësit e Policisë si dhe i ka ofenduar ata. Për këtë arsye, ndaj Pranvera Isufaj ka nisur hetim për veprat penale “Prodhimi, mbajtja, blerja apo shitja pa leje e armëve të ftohta” dhe “Kundërshtimi i punonjësit të Policisë së Rendit Publik”. Ndërsa për dy pronarët e lokalit, Shkëlzen Gjata dhe Mariglen Mellaraj, po hetohet për veprën penale “Prodhimi dhe shitja e lëndëve narkotike”, “Përshtatja e lokalit për përdorim droge” dhe “Nxitja për përdorimin e drogës”. Lokali “New York” njihej në qytetin e Fierit si vend ku organizoheshin festa dhe konsumohej drogë, për këtë arsye, Policia po heton nëse ka pasur edhe raste të tjera të shitjes së kokainës në festa të organizuara në këtë ambient. m. r