Sa do paguajmë për Rrugën e Kombit, Basha: Taksa, akt primitiv urrejtjeje
Kompania bën gati "xhepat" para tunelit të Kalimashit
Pas 1 jave, kalimi në Rrugën e Kombit do të bëhet me pagesë. Ashtu siç ishte parashikuar në kontratën e koncesionarit, të miratuar në dhjetor 2016, të gjitha mjetet që do të kalojnë në autostradën e Kombit, do të paguajnë nga 5 deri në 22.5 euro për çdo kalim.
Konsorciumi turko- shqiptar ka nisur prej dy ditësh përshtatjen e rrugës dhe krijimin e "xhepave" para hyrjes në tunelin e Kalimashit, për kalimin e makinave, ku do të bëhet edhe pagesa. Një udhëtim normal, nga Shqipëria në Kosovë dhe kthim, do të kushtojë 10 euro ose 1300 lekë. Ministria e Transporteve, përgjegjëse për rrugët, ka sqaruar dje të gjithë procedurën që është ndjekur dhe po ndiqet për sistemin e taksimit të autostradës.
SQARIMI I MINISTRISË
Nisur nga situata e krijuar, ku shumë makina janë detyruar të kalojnë në pikat e pagesës, por pa paguar, ka reaguar Ministria e Transporteve. Sipas saj, koncesionari, duke nisur nga sot ( dje), është në fazën e testimit të sistemit të TOLLit. Makinat kalojnë pa u kërkuar pagesa, por thjesht testohet nga ana teknike sistemi. Kjo do të vazhdojë deri javën e ardhshme. Më pas, do përcaktohet data e fillimit të kalimit kundrejt pagesës. Ministria sqaron se "me Marrëveshjen e koncesionit, datë 6.12.2016 ' Për ndërtim, përmirësim, shfrytëzim, mirëmbajtje të Autostradës Milot- Morinë', miratuar me VKM nr. 870, datë 14.12.2016 ' Për miratimin e kontratës së koncesionit', ' Për ndërtimin, përmirësimin, shfrytëzimin dhe mirëmbajtjen e autostradës Milot - Morinë', ndërmjet Republikës së Shqipërisë, të përfaqësuar nga Ministria e Transportit dhe Infrastrukturës dhe Konsorciumit ' Catalyst Viva Das General Contracting, LLC- Salillari shpk - Bee Tech- Violiap Ateve - Kastrati sh. a.', ndër të tjera parashikohet se:
Koncesionari përdor një shesh me dy kahe për pagimin e taksës në afërsi të tunelit të Thirrës dhe koncesionari mbledh dhe mban të ardhurat nga taksa e rrugës. Objektivi kryesor i këtij projekti koncesion/ PPP i punimeve dhe shërbimeve është përmirësimi i au- tostradës dhe shfrytëzimi dhe mirëmbajtja efikase e saj. Koncesionari do të përmirësojë, operojë dhe mirëmbajë autostradën sipas një pakete të paracaktuar të standardeve të performancës për një periudhë 30- vjeçare të koncesionit".
SA DO PAGUHET
Tarifa e kalimit në rrugë do të variojë nga lloji i automjetit. Dje në pikën e kalimit, prova tregonte se një makinë do të paguajë 650 lekë për çdo kalim. Tarifat, në fakt, janë miratuar në euro dhe, sipas tyre, çdo motor do të paguajë 2.5 euro, çdo makinë 5 euro për çdo kalim. Tarifat vijojnë në rritje, nga 11.2 euro për autobusët deri në 16.2 euro për kamionët e mesëm dhe arrijnë në shifrën e frikshme prej 22.5 eurosh për çdo kalim të kamionëve të rëndë. Studimi i IFC- së, para firmosjes së koncesionit parashikonte një trafik prej 5 mijë makinash në ditë. Me një llogari të thjeshtë, sikur të mos kalonte asnjë kamion, por vetëm vetura me pagesë prej 5 eurosh, tarifa e mbledhur nga koncesionari do të arrinte në 25 mijë euro në ditë, ose rreth 9.1 milionë euro në vit.