Ish- Kryeprokurori Llalla po hetohet për pastrim parash në përmasa të mëdha
"Rasti i ish- Prokurorit të Përgjithshëm është vetëm fillimi i kapjes së ' peshqve të mëdhenj' që do të ndiqet se shpejti"
Transparencë dhe fakte. Me këtë moto, Komisioni i Pavarur i Kualifikimit, ( KPK) motori i vetingut, ka filluar këtë javë sesionet e dëgjesave publike të gjykatësve dhe prokurorëve që pretendojnë të jenë pjesë e sistemit të reformuar të drejtësisë.
Kush kalon testin nga ky Komision, do të vazhdojë të jetë prokuror apo gjykatës në sistemin e reformuar të drejtësisë. Kush nuk e kalon, mbetet jashtë sistemit dhe subjekt i mundshëm i ndjekjes penale. Rastësi apo jo, i pari në listën e gjykatësve në këtë proces nuk e kaloi dot testin. Komisioni shkarkoi të premten ( 23.03.2018) anëtarin e Gjykatës Kushtetuese, Fatos Lulo, që kishte deklaruar një pasuri prej rreth 700 mijë eurosh. Avokati i tij nuk solli dot para komisionit, në seancën e dëgjesës publike, të hapur për mediat, dokumente zyrtare për burimin e kësaj pasurie. Ky është rasti i parë, kur Komisioni i Pavarur i Kualifikimit shkarkon një gjykatës të nivelit të lartë dhe hap procesin e çrrënjosjes së ryshfetit dhe korrupsionit në drejtësinë e Shqipërisë, duke hedhur bazat për një gjyqësor profesional, të pavarur, me gjykatës e prokurorë me integritet moral. Gjithë procesi i verifikimit dhe vendimet e këtij Komisioni po monitorohen nga ekspertë të pavarur ndërkombëtarë.
ÇMONTIM I KULTURËS SË PANDËSHKUESHMËRISË
Lista me emrat e gjykatësve dhe prokurorëve që do kalojnë në sitën e vetingut është e gjatë, plot 800 syresh. Vetëm 2% ose 17 gjykatës dhe prokurorë dhanë dorëheqjen dhe u vetëpërjashtuan nga drejtësia, para se vetingu të fillonte, duke përfituar nga ligji i vetingut që ua jepte këtë mundësi. Por dorëheqja nuk u jep atyre imunitet për t'i shpëtuar drejtësisë pa i hyrë gjemb në këmbë, nëse kanë kryer vepra penale. Drejtësia po tregon se po vepron në bazë të provave dhe fakteve. Rasti më domethënës është ai i ish- Prokurorit të Përgjithshëm, Adriatik Llalla, ndaj të cilit Prokuroria ka hapur çështje penale për pastrim parash në përmasa të mëdha, edhe pse Llalla deklaroi para se të fillonte vetingu largimin vullnetar nga drejtësia. Atë që nuk e bëri dot organi i Akuzës i drejtuar nga Llalla, që erdhi në krye të Prokurorisë në vitin 2012 dhe qëndroi deri në mbyllje të mandatit 5vje? ar, më 3 dhjetor 2017, e nisi Departamenti Amerikan i Shtetit. Muajin e kaluar ai mori vendimin që ishKryeprokurori dhe familja e tij të futen në listën e zezë dhe të mos u lejohet hyrja në SHBA, "për shkak të përfshirjes së tij në raste të mëdha korrupsioni". Fakte dhe dokumente zyrtare, të botuara në media, kanë bërë transparente për publikun shit- blerje tokash, ullishtash, në sipërfaqe të mëdha dhe pasurish të paluajtshme që ish- Prokurori i Përgjithshëm i blinte shumë lirë dhe pasi bëhej rivlerësimi i tyre, i shiste 20- 30 herë më shtrenjtë. Dokumentet zyrtare flasin për transaksione financiare me persona me precedentë penalë që lidhen me krime të rënda. Hetimi ndaj ish- Prokurorit të Përgjithshëm, Adriatik Llalla, është një sinjal se për kulturën e pandëshkueshmërisë, të betonizuar në Shqipëri prej më shumë se dy dekadash, po fillon procesi i çmontimit. Burime diplomatike në Tiranë, që ndjekin nga afër këtë proces thanë për D Ë se rasti i ish- Prokurorit të Përgjithshëm është vetëm fillimi i kapjes së "peshqve të mëdhenj", që do të ndiqet se shpejti edhe nga raste të tjera.
RAMA - KOHA PËR HAPJEN E NEGOCIATAVE TË ANËTARËSIMIT
Asi, që ka në dorë Shqipëria 3 javë para publikimit të Progres Raportit 2017, është pikërisht progresi në Reformën në Drejtësi. Rezultatet konkrete në procesin e spastrimit të drejtësisë nga gjykatës dhe prokurorë të korruptuar kanë rritur shpresat e Shqipërisë për hapjen e negociatave të anëtarësimit me BE. Kjo, pasi kryerja e vetingut dhe rezultatet e tij të prekshme janë kushti kryesor i KE- së. Shqipëria e meriton! Me këtë bindje, Kryeministri Rama ka nxitur ditët e fundit përfaqësuesen e lartë të BE- së, Mogherini, Komisionerin Hahn dhe Parlamentin Europian që të kuptojnë se koha për hapjen e negociatave ka ardhur". Shqipëria nuk kërkon ndonjë dhuratë, as ndonjë favor që nuk e meriton. Shqipëria po kërkon thjesht të hapen negociatat, sepse e meriton", ka theksuar të premten, ( 23.03.2018) Rama, në një fjalë të mbajtur në Parlamentin Europian. Krahas kësaj bindjeje, Kryeministri Rama ka risjellë si argument situatën gjeopolitike në rajon, përpjekjet e Rusisë dhe aktorëve të tjerë si Kina apo Turqia për të rritur ndikimin e tyre. Hapja e negociatave si një progres drejt hyrjes në BE do "të ndalojë shfaqjen e fantazmave të së kaluarës", ka theksuar Kryeministri në Parlamentin Europian, duke u risjellë në vëmendje europarlamentarëve se rajoni i njohur për konfliktet etnike dhe luftërat e përgjakshme pas viteve 1990 po forcon paqen dhe bashkëpunimin, pikërisht, sepse ylli i tij polar është hyrja në BE. Por ngadalësimi i ritmeve në procesin e integrimit mund të sjellë pasoja negative në pro- europianizmin e qytetarëve të Ballkanit Perëndimor, kur faktorë të tjerë gjeostrategjike kërkojnë të rrisin aksionet e tyre në rajon, paralajmëroi në Bruksel përsëri Kryeministri Rama.
Lista me emrat e gjykatësve dhe prokurorëve që do kalojnë në sitën e vetingut është e gjatë, plot 800 syresh. Vetëm 2% ose 17 gjykatës dhe prokurorë dhanë dorëheqjen dhe u vetëpërjashtuan nga drejtësia, para se vetingu të fillonte, duke përfituar nga ligji i vetingut që ua jepte këtë mundësi. Por dorëheqja nuk u jep atyre imunitet për t'i shpëtuar drejtësisë pa i hyrë gjemb në këmbë, nëse kanë kryer vepra penale”