BERZH rekomandoi 8 rrugë me pagesë
Strategjia në tri faza, akset që do taksohen të parat
Në një draft të para 2 viteve, BERZH i ka rekomanduar qeverisë shqiptare të aplikojë pagesë edhe për 8 rrugë të tjera. Sipas strategjisë së taksimit të rrugëve, tarifa që duhet të paguajnë qytetarët varion nga 0,5 euro cent në 3,5 euro cent për kilometër. Në strategji rekomandohet që aplikimi i taksimit për koncesionin e rrugëve të zhvillohet gradualisht, në 3 faza. Për zbatimin e menjëhershëm, rekomandohet vendosja e taksës në rrugën Tiranë- Durrës, Tiranë- Elbasan dhe Rruga e Arbrit, e cila ende nuk ka përfunduar.
Sipas tarifave të propozuara nga BERZH- i dhe llogaritjeve për koston minimale dhe maksimale të kalimit, një makinë pa TVSH që të përshkojë aksin Tiranë- Durrës duhet të paguajë 0,17 euro, sipas tarifës minimale dhe 1,19 euro pagesa minimale. Për rrugën Tiranë- Elbasan, tarifat që llogariten variojnë nga 0,135 euro cent në 0,945 euro cent. Në Rrugën e Arbrit që ende nuk ka përfunduar, tarifat e taksimit për koncesion variojnë nga 0,375 euro cent në 2,625 euro cent.
Në fazën e dytë propozohet tarifimi për rrugën Levan- Vlorë dhe Durrës- Fier. Kostot e kalimit në rrugën Levan- Vlorë variojnë 0,121 deri 0.847 euro cent, ndërsa në rrugën DurrësFier pagesat variojnë nga 0,341 në 2,387 euro cent. Për zbatim në fazën e tretë rekomandohet taksimi për rrugën ElbasanKapshticë dhe Tiranë- Hani i Hotit.
Për këto dy rrugë, strategjia e BERZH- it nuk rekomandon dhënien me koncesion të gjithë aksit, por vetëm një pjesë të tyre. Për rrugën Elbasan- Kapshticë rekomandohet dhënia me koncesionin vetëm për 41,6 kilometër. Tarifat që llogariten për këtë aks variojnë nga 0,208 euro cent në 1,456 euro cent. Për rrugën Tiranë- Hani i Hotit rekomandohet dhënia me koncesion për 45 kilometër. Tarifat që llogariten variojnë 0,225 deri në 1,575 euro cent.
Në draftin e strategjisë, rekomandohet që norma bazë e taksës së kalimit në rrugë për veturat të variojë nga 0,5 cent deri në 3,5 cent për kilometër, kurse për motoçikletat 0,5 cent për kilometër. Në tarifim janë përfshirë edhe furgonët, norma e tarifimit për ta është përcaktuar 1,5 cent për kilometër, kurse për autobusët 2 deri në 3 cent për kilometër dhe për kamionët 4 cent për kilometër. Në rast se tarifat e rekomanduara miratohen nga qeveria, për një rrugë ku kalimi do të jetë me pagesë, për 100 km, një veturë do të paguajë 3,5 euro.