Kosova kundër taksës në Rrugën e Kombit
Ministri Lekaj: Nuk bënë asnjë konsultë me Kosovën
Hyrja në fuqi e taksës në Rrugën e Kombit nuk është pritur mirë as nga qytetarët dhe as nga qeveria e Kosovës. Me një deklaratë, që me sa duket ishte pasojë e mungesës së informacionit, ministri i Infrastrukturës Pal Lekaj, tha fillimisht se do të shqyrtonin raportet dhe tarifat me qeverinë shqiptare. “Sa i përket tarifës së pagesës për shfrytëzimin e autostradave, presim një raport matjeje për numrin e automjeteve që qarkullojnë dhe për kushtet e tjera që duhet të plotësohen për të arritur një çmim, i cili do të jetë i arsyeshëm për qytetarët... Ne jemi të interesuar që sa ma parë t’i definojmë gjërat sa u përket autostradave, edhe për pagesat në rrugë, por edhe për funksionalizimin e vendeve të parapara për pushimore në brezin rrugor”, ka thënë Lekaj, duke shtuar se do të merren parasysh modelet më të mira për zhvillimin e këtij projekti. Por me përgjigjen e zyrtarëve shqiptarë se tarifat janë vendosur dhe nuk lëvizin më që me marrëveshjen e nënshkruar në vitin 2016- të, Lekaj tha se qeveria shqiptare nuk është konsultuar me atë të Kosovës për këtë çështje. “Asnjë konsultë nuk kanë bërë me Kosovën. Është dashur të paktën të bisedojnë dhe të na tre- gojnë për këtë taksë. Të hënën do t’ua bëj një shkresë zyrtare për një takim dhe të shohim...”, tha Lekaj për “Express”, duke konsideruar se kjo “Realisht është një taksë e madhe për shqiptarët”. Ndërsa zëvendësministri i Punëve të Jashtme i Kosovës, Anton Berisha, ka thënë se vënia e taksës në Rrugën e Kombit është kundër integrimit ndërshqiptar, si dhe interesave të vetë kombit, ndërsa më të goditur nga ky vendim janë qytetarët e Kosovës. Por, sipas tij, ky vendim do ta dëmtojë edhe Shqipërinë. “Ekonomikisht do të jetë edhe kundër shtetit shqiptar. Me liberalizimin e vizave, që tashmë është i pashmangshëm, shqiptarët e Kosovës nuk kanë pse të ‘ patriotizohen’ në taksat absurde të qeverisë aktuale shqiptare. Në rrugë të hapura, humbës do të jetë ai që vë pengesa në to përmes ‘ penalizimit’”. Në një prej komenteve më të ashpra dhe thumbuese, juristi dhe analisti politik, Dastid Pallaska, tha se pagesa për Rrugën e Kombit ka për qëllim mbulimin e rënies së përkohshme të biznesit të drogës.