Erdogan: Nisëm operacionet në Irak, do spastrojmë PKK
“Nëse terroristët kurdë s’largohen vetë, do t’i largojmë ne”
Presidenti i Turqisë, Recep Tayyip Erdogan, ka njoftuar të dielën se vendi i tij ka nisur operacionet në Veri të Irakut kundër rebelëve kurdë, që Turqia i njeh si terroristë.
Erdogan tha të dielën se operacionet kanë nisur në Sinjar për të pastruar zonat malore nga luftëtarët e Partisë së Punëtorëve të Kurdistanit apo PKK. Erdogan tha se në rastin që PKK nuk largohet nga Sinjari dhe Qandil, ku ka zyrat qendrore, “do të ishte e paevitueshme për ne ta bëjmë personalisht këtë”. Presidenti turk paralajmëroi një operacion të ngjashëm me atë në Afrin në Sirisë, ku ushtria mund të hyjë, edhe për të marrë nën kontroll territorin në rast se nuk largohen prej aty anëtarët e PKK- së. “Ne thamë se do të shkojmë në Sinjar. Tani operacioni ka nisur atje. Lufta është nga brenda dhe nga jashtë”, tha Er- dogan, por pa detajuar se për çfarë operacioni bëhet fjalë. Që javën e kaluar, Presidenti Erdogan tha se po krijonin një bazë të re në Sinjar dhe se forcat turke do të sulmonin nëse do ta shihnin të nevojshme këtë. Ndërsa në Veri të Irakut, PKK ka njoftuar se pritet të largohet nga Sinjari, ku ka qëndruar që në vitin 2014 pasi i erdhi në ndihmë komunitetit Yazidi kur u sulmuan nga ISIS. Nuk është e qartë se sa shumë prej tyre kanë mbetur në ato zona. PKK është përplasur me trupat e qeverisë turke në territorin e Turqisë prej më shumë se tri dekadash. Ajo konsiderohet një organizatë terroriste nga Turqia, Bashkimi Europian e Shtetet e Bashkuara dhe prej dekadash e ka bazën në rajonin malor Qandil në Irak, afër kufirit me Iranin.
Ndërkohë, Komanda e Operacioneve të Përbashkëta në Irak ka mohuar se ndonjë forcë e jashtme mund të ketë kaluar kufirin e Irakut. Sipas “Reuters”, në një njoftim të komandës së përbashkët thuhej se, “Komanda e operacioneve konfirmon se situata në Nineveh, Sinjar dhe zonën kufitare është nën kontrollin e forcave irakiane të sigurisë dhe nuk ka asnjë arsye që trupat të kalojnë kufirin e Irakut në këto zona”.