Kreu i Hipotekës: Një 10- vjeçar u bë pronar toke
Kreu i Zyrës Qendrore të Regjistrimit të Pasurive të Paluajtshme, Elion Semanaj, doli ditën e djeshme në një deklaratë për mediat, për të folur për skandalet me tjetërsimet e pronave në bregdet. Ai tregoi të gjithë mekanizimin e falsifikimit të dokumenteve të pronave, ku përmendi disa raste, përfshirë edhe një person që ishte trajtuar me tokë kur ishte vetëm 10 vjeç. “Raste abuzive janë evidentuar si në regjistrimet e vendimeve të gjykatave, edhe në regjistrimin e akteve administrative të lëshuara nga institucionet që krijojnë tituj pronësie, duke shpërdoruar autoritetin dhe kompetencat e ngarkuara me ligj. Sa më sipër, mund të përmendim rastin kur me një vendim Gjykate të një niveli më të ulët është rritur sipërfaqja e pasurisë me 20 hektarë kur kjo pasuri dhe sipërfaqja është përcaktuar dhe regjistruar me vendim të Gjykatës së Apelit. Ky veprim është kryer në bashkëpunim me Zyrën Vendore, e cila nuk ka ankimuar vendimin dhe nuk ka paraqitur provat e nevojshme pranë Gjykatës. Kjo ka sjellë si pasojë rritjen e sipërfaqes në favor të spekulantit, duke dëmtuar rëndë interesat e shtetit”, tha Semanaj në fillim të fjalës së tij. Më pas, ai tregoi rastin e një personi që ishte trajtuar me tokë bujqësore sipas ligjit në fuqi, por vetëm kur ishte 10 vjeç. “Në një rast tjetër flagrant, Zyra Qendrore, gjatë kontrolleve, ka evidentuar shkelje në lidhje me regjistrimet e akteve të marrjes së tokës në pronësi apo siç njihen, AMTP. Kështu, Njësia Vendore ka plotësuar dhe konfirmuar AMTP për një person, i cili ka qenë minoren në momentin e përfitimit të tokës bujqësore në bazë të ligjit 7501. I gjithë dokumentacioni është përcjellë si i rregullt nga Njësia Vendore drejt Zyrës Vendore të Regjistrimit, gjë që bie në kundërshtim me të gjitha aktet ligjore dhe nënligjore në fuqi. Kështu, ky minoren ka përfituar tokë bujqësore në familjen e babait të tij, por ka përfituar edhe AMTP të vetën personale si kryefamiljar, kur në fakt ishte vetëm 10 vjeç, në kundërshtim të hapur me ligjin. Veprimet e kryera nga Njësia Vendore nuk janë kundërshtuar nga Zyra Vendore, por është vijuar me regjistrimin e akteve në kundërshtim me ligjin dhe VKM nr. 994 të vitit 2015, ku pjesë përbërëse e dokumentacionit është dhe certifikata e gjendjes familjare e vitit 1991”, tha ai. Sipas kreut të Hipotekës, në vazhdim të regjistrimit të abuzimeve me aktet e marrjes së tokës në pronësi janë dhe rastet e korrigjimit të zërave kadastralë të pasurisë, ku si fenomen kryesor evidentoi ndryshimin e zërit kadastral ‘ ranishte e kënetë’, në ‘ tokë bujqësore’, në kundërshtim me procedurat e përcaktuara në ligj.