Vlahutin: E patolerueshme që toka nuk u është kthyer pronarëve pas 27 vitesh
VLORE – Ambasadorja e Bashkimit Europian, Romana Vlahutin, ka zhvilluar një vizitë në Vlorë për adresimin e zgjidhjes së çështjes së pronave. Vlahutin ka zgjedhur Vlorën për nisjen e një turi të tillë takimesh, duke e konsideruar një nga qarqet më problematikë. Ambasadorja, në fjalën e saj, u shpreh se Reforma e çështjes së Pronësisë është e dyta për nga rëndësia, pas Reformës në Drejtësi. Gjatë qëndrimit në qytetin bregdetar, ajo zhvilloi takime në Bashki, Gjykatë, Prokurori, Hipotekë dhe në zyrat e ALUIZN- it, e shoqëruar nga ministrja e Drejtësisë, Etilda Gjonaj. “E nisëm nga Vlora sepse ky qytet, por edhe ky qark, ka problematikën më të theksuar me pronat”, deklaroi Vlahutin. “Për mua dhe për BE- në, ky është një udhëtim faktmbledhës. Duam të flasim me gjithkënd, që në një mënyrë ose në një tjetër ka lidhje me çështjen e pronësisë. Me institucionet administrative dhe Policinë, me Prokurorinë, gjykatat, por për ne, thelbësore ishte takimi me qytetarët. Prona private është e drejtë themelore e njeriut dhe për ne si BE është e panegociueshme. Gjatë 27 viteve të fundit, edhe më parë ka pasur një kaos që është shkaktuar për çështjen e pronësisë. Pas Reformës në Drejtësi, kjo është reforma tjetër më e rëndësishme për shqiptarët”, shtoi ambasa- dorja e BE- së. Vlahutin theksoi se është e patolerueshme që kanë kaluar 27 vite nga regjimi demokratik dhe ende pronarët nuk gëzojnë të drejtën e pronës së tyre. “Do të kemi takime të ngjashme në bashki të tjera të vendit dhe së bashku me Ministrinë e Drejtësisë do të gjejmë një mënyrë për të ndihmuar dhe për të analizuar situatën nga këndvështrimi ligjor dhe nga përvoja të ndryshme që kanë pasur njerëzit. Dhe të gjejmë më pas zgjidhjen më të drejtë, që do të respektojë dhe mbi të gjitha të drejtën e pronësisë. Ka një problem me ish- pronarët që për 27 vjet nuk regjistrojnë pronën, që të afërmit e tyre e kanë pasur për 300 vjet. Dhe kjo është pika nga do të fillojmë”, përfundoi Vlahutin. Ndërkohë, referuar kësaj problematike, ministrja e Drejtësisë, Etilda Gjonaj, theksoi se procesi i verifikimit të të gjitha abuzimeve me pronat do të asistohet pikërisht nga ekspertë të BE- së. Gjonaj shtoi se ka ardhur koha që kjo çështje të marrë zgjidhje përfundimtare. Takimi i Vlahutin dhe Gjonaj në Vlorë, vjen menjëherë pas vendimit për pezullimin e dhënies së lejeve dhe certifikatave të pronësisë së tokave në bregdet.