ARGUMENTET E PROFESOR FUGËS PËR DRAFTIN

Projektligji për Akademinë është i dështuar, nuk na çon gjëkundi, nuk realizon qëllimin e këtyre muajve të gjatë përpjekjesh për reformimin pas zgjedhjeve farsë

Nga ana e Ministrisë së Arsimit dhe me bashkëpunime të veçuara nga Akademia u bë një mbivendosje komisionesh. Nga Komisioni Ad Hoc për reformimin e Akademisë, ngritur nga asambleja në nëntor të vitit të kaluar, u kooptuan disa anëtarë dhe u vendosën në komisionin e Ministrisë së Arsimit

Të gjitha komisionet, si ai i Akademisë, ashtu dhe ai i Ministrisë, kanë punuar në mënyrë të mbyllur dhe të izoluar, pa konsultime dhe pa shkëmbime mendimesh

Nuk u bë asnjë analizë e gjendjes së Akademisë së Shkencave dhe strategjive të reformimit të saj, për të parë se çfarë duhej bërë ndryshe dhe të artikulohej ndryshe në projektligj

Për gjykimin e projektligjit, nuk na u la më shumë se 72 orë për ta shqyrtuar, madje edhe ato, gjatë fundjavës

Projektligji përmban ende mendësinë dhe insiston me kokëfortësi që Akademia e Shkencave të jetë me një model të dështuar, pra, si një ombrellë institucionesh kërkimore shkencore. Institutet që kanë dalë nga dera, rihyjnë nga dritarja, kur për krijimin e tyre ka ligje tashmë të aprovuar

Konsiderimi i “Akademisë së të rinjve” si pjesë e Akademisë, është një paradoks logjik, pavarësisht se Akademia duhet të ketë zgjatime të tilla veprimtarie jashtë saj

Projektligjit i mungon dora e një juristi kushtetues, nuk sheh asgjë që të përbëjë një hop, një ndryshim, me kuadrin institucional dhe kuadrin juridik të mëparshëm të Akademisë së Shkencave. Nuk ka asnjë relacion bashkëshoqërues të tregojë përsenë e ndonjë ndryshimi

Projektligji e lë Akademinë e Shkencave me një model financimi dhe veprimtarish si më parë, ndërtuar pikërisht që të ruajë statuskuonë tonë të deritanishme, të papranueshme dhe me të drejtë të kritikueshme nga opinioni publik i vendit

Komisioni Ad Hoc i reformimit të Akademisë është bllokuar në funksionin e tij, ka punuar larg akademikëve, seksioneve, larg asamblesë, me konflikte interesi, me superpozime me komisionin pranë zyrave të Ministrisë së Arsimit. Ai duhet të konsiderohet i shkrirë