PS dhe PD bëhen bashkë në Kukës: Hiqni taksën e rrugës
Kreu i bashkisë, Bashkim Shehu: Na keni vënë lakun në fyt
Nëse nuk do të pranohet kërkesa për përjashtimin nga taksa e Rrugës së Kombit, banorët e Bashkisë së Kukësit do të dalin në protestë.
Këtë gjë kanë paralajmëruar anëtarët e Këshillit Bashkiak të qytetit verilindor në mbledhjen e fundit. Me votë unanime, 17 anëtarët që ishin prezentë, mes së cilëve përfaqësues të PS- së dhe PD- së, u vendos që t’i kërkohet Kryeministrit Edi Rama dhe Parlamentit, që banorët e Kukësit të përjashtohen nga taksa që do të hyjë në fuqi së shpejti për të gjithë automjetet që do të kalojnë në Rrugën e Kombit. Nëse një kërkesë e tillë nuk do të merret parasysh gjatë seancës së ardhshme parlamentare, atëherë anëtarët e Këshillit Bashkiak kanë paralajmëruar se do të mbajnë protestë gjatë fundjavës, duke mos përcaktuar nëse do të organizohet më 30 apo 31 mars. Gjatë mbledhjes së fundit, këshilltarët e Partisë Demokratike shprehen se tarifat e reja do të varfërojnë më tej banorët e kësaj zone, të cilët e përdorin më shpesh autostradën. “I larguan nga ndihma ekonomike, t’u vendosësh edhe taksë, t’u marrësh edhe pasuritë, qoftë ujore, qoftë minerare, t’i trajtosh si qytetarë të dorës së dytë, besoj se nuk kanë se çfarë të bëjnë më për Kukësin tonë”, tha Arif Rexhmati, kryetari i Grupit të Këshilltarëve të Djathtë. Këshilltarët thanë se qëndrimi i tyre nuk ndikohet nga subjektet politike që përfaqësojnë, pasi taksa rëndon po njësoj si në xhepat e qytetarëve të djathtëve, ashtu dhe të të majtëve. Tatjana Kërgjaliu, kryetare e Grupit të Këshilltarëve të Majtë, u shpreh se duhet vepruar sa më shpejt, pasi nuk ka shumë kohë deri në aplikimin e kësaj takse. “Një grup prej nesh të shkojnë te prefekti, që të njihemi nga afër me përgjigjen e instancave”, tha Kërgjaliu. Aplikimin e taksës në Rrugën e Kombit e ka kundërshtuar dhe kreu i Bashkisë Kukëz, Bashkim Shehu, i cili e cilëson si një prej vendimeve më absurde të qeverisë. “Kjo taksë, tërësisht e padrejtë, është një barrë e shtuar për qytetarët dhe bizneset e Kukësit që po tkurren çdo ditë e më shumë”, është shprehur Shehu. Kryebashkiaku demokrat thotë se vendimet si heqja e pajusti- ANËTARË të Këshillit Bashkiak të Kukësit kanë votuar unanimisht kundërshtimin e taksës për Rrugën e Kombit, që do të nisë të aplikohet për çdo automjet që do të kalojë në këtë autostradë nga data 15 prill fikuar e 3630 familjeve nga skema e ndihmës ekonomike, mungesa e investimeve publike dhe krijimi i diferencave buxhetore, ka bërë që nga viti 2015, Kukësi të humbasë rreth 30% të popullsisë së tij. “Kukësit i kanë vënë lakun në fyt”, shprehet Shehu. Kundër taksës, ka mbajtur qëndrim dhe shoqëria civile e qytetit të Kukësit, duke theksuar se kjo do të sjellë pasojë për ekonominë. Por gjithashtu, vendosja e taksës për kalimin në Rrugën e Kombit do të përkthehet menjëherë në rritjen e çmimit të biletës nga shoqëritë e transportit privat. “Deri tani kemi punuar me një biletë që kushton 400 lekë, ndërsa taksa na detyron ta rrisim këtë çmim”, shprehet një përfaqësues i shoqërisë së transportit. Këtë të diel nisi testimi i aplikimit të taksës së Rrugës së Kombit, ndërsa pas datës 15 prill kushdo që do të qarkullojë në këtë autostradë, do të paguajë tarifa që varjojnë nga 2.5 euro deri në 22.5 euro, në varësi të llojit të mjetit.