Dosja e kokainës kalon në Prokurorinë e Durrësit
Krimet e Rënda, moskompetencë për kokainën e gjetur në kontenier
Dosja e famshme hetimore e trafikut të 613 kg kokainë, të sekuestruara në Maminas më 28 shkurt të këtij viti, do të kalojë për hetim në Prokurorinë e Durrësit. Shkak për këtë është bërë një vendim unifikues i Kolegjit Penal të Gjykatës së Lartë, e cila i jep Prokurorisë së Krimeve të Rënda kompetencat lëndore të Prokurorisë së Posaçme që ende nuk është ngritur. Në këtë mënyrë, bashkë me vrasjet për shkak të marrëdhënieve familjare, në prokuroritë e rretheve do të kalojnë edhe trafiqet, në rast se nuk konstatohet grupi i strukturuar kriminal. Për rastin në fjalë, nuk ka ndonjë akuzë për grup të strukturuar kriminal dhe dosja zhvendoset në Prokurorinë e Durrësit. Për drogën janë arrestuar deri më tani vetëm shoferi i kamionit, Armand Pezaku, dhe Donaldo Lushaj, që ishte menaxheri i firmës “Arbri Garden” që kishte porositur kontenierin me banane në Kolumbi. u zbuluan në një kontenier me banane, që kishte mbërritur më 19 shkurt në portin e Durrësit. Kontenieri që vinte nga Kolumbia, kishte ndaluar më parë në portin e Livornos dhe më pas në Maltë, përpara se të mbërrinte në Shqipëri. Ndërsa pronari i firmës, Arbër Çekaj, është në kërkim ndërkombëtar dhe ende nuk është arrestuar. Në kontenierin me banane u gjetën plot 613 kg kokainë. Megjithatë, gjatë hetimeve, në rast se konstatohet grup i strukturuar kriminal, atëherë dosja transferohet sërish te Krimet e Rënda. Gjykata e Apelit për Krime të Rënda vendosi më 20 mars, që Pezaku dhe Lushaj të qëndrojnë në burg, por tashmë avokatët e tyre kanë një mundësi tjetër që t’i ankimojnë masat në Apelin e Durrësit. Kontenieri me drogë hyri në Shqipëri më 19 shkurt të këtij viti dhe Dogana shqiptare pati sinjalizime nga autoritetet italiane se në të ishte ndërhyrë. Për të shuar dyshimet, Dogana së bashku me Policinë bënë një ndërhyrje në pjesën fundore të kontenierit, ku zbuluan gjurmë silikoni. Ata më pas evidentuan sasinë e kokainës dhe vendosën që të bëjnë dorëzim të komanduar të kontenierit për të identifikuar porositësit dhe denstinacionin. Agjenti doganor njoftoi në telefon menaxherin Lushaj, që të paraqitej pasi kontenieri kishte probleme. Pasi kryen të gjitha procedurat doganore, kontenieri u la të lëvizte dhe u ndoq nga Policia deri te magazina e “Arbri Garden” në Maminas. Aty, Policia veproi dhe arrestoi vetëm Pezakun, shoferin e kamionit dhe Lushajn. Këta të dy insistojnë se nuk kanë lidhje me drogën. Në fundin e dyfishtë të kontenierit me banane, të mbërritur për llogari të kompanisë “Arbri Garden”, u zbuluan 528 pako kokainë, të cilat ishin të shënuara nga sipër me kode të ndryshme. “777”, “KE”, “020”, “CA 17”, janë disa nga kodet e shënjuara sipër mbështjellëses së pakove me lëndë narkotike. Nisur nga këto rrethana, grupi hetimor ka dyshime se droga që mbërriti më 19 shkurt në Portin e Durrësit, ishte porositur nga të paktën 20 persona, që momentalisht po hetohen me metodat speciale nga ana e Antidrogës.