Serbët ikin nga qeveria, do ta formojnë vetë Asociacionin
Rakiç takon Vuçiç e Gjuriç, bllokohet rruga në Mitrovicën Veriore
Lista serbe ka vendosur të tërhiqet nga qeveria e Kosovës pas ngjarjeve të së hënës, ku zyrtari serb, Marko Gjuriç, u arrestua bujshëm në Kosovë.
Tërheqja e listës serbe mund të shkaktojë zgjedhje të reja në Kosovë, në rast se nuk gjendet një koalicion i shpejtë për të mbajtur në fuqi qeverinë “Haradinaj”, por politikanët serbë të Kosovës kanë në plan të bëjnë akoma më keq se kaq. Të “fryrë” nga Beogradi zyrtar, ata kanë në plan të formojnë Asociacionin e Komunave me shumicë serbe në territorin e Kosovës pa qeverinë e Kosovës, pra, pa miratimin e Parlamentit të Kosovës, duke krijuar një përçarje të hidhur etnike. Sipas tyre, formimi i Asociacionit është një detyrim i ndërmarrë nga autoritetet në Prishtinë sipas marrëveshjes së Brukselit 2013, por ende nuk është përmbushur. Njoftimi është bërë nga Goran Rakiç, pasi përfaqësuesit e Listës Serbe zhvilluan një takim në Beograd me presidentin Aleksandër Vuçiç dhe drejtorin e Zyrës së Qeverisë për Kosovë e Metohi, Marko Gjuriçin. Rakiç tha se Vuçiç ishte “i informuar për këtë” dhe tha se ai do të “mbështeste çdo vendim që ata bëjnë”. Në Mitrovicë ndërkohë, situata është përshkruar pa incidente, por me një lloj tensioni në ajër. Serbët kishin ngritur një bllokadë në rrugën kryesore PrishtinëRashkë, ndërsa rreth 50 kamionë ishin parkuar në kalimin administrativ të Jarinjes. Pati raportime se pjesëtarë të forcave të Policisë Speciale të Kosovës, ROSU, ishin të pranishëm mëngjesin e së martës në rrugë, por në pjesën jugore të Mitrovicës ku jetojnë shumica shqiptarë. Gjuriç u arrestua të hënën në pjesën veriore të Mitrovicës, ku po merrte pjesë në një mbledhje të dedikuar për dialogun e brendshëm mbi Kosovën. Ai kishte hyrë pa lejen e autoriteteve në Kosovë.