FLET MINISTRI AHMETAJ Lista e ISSH, pensionistët që përjashtohen nga taksat
Ministri i Financave sqaron dy taksat që nisin nga 1 prilli: Kategoritë e pensionistëve që përjashtohen nga taksa e shtëpisë. ISSH, gati listat
Nga 1 prilli nis zbatimin taksa e re e shtëpive dhe përfshirja e biznesit me xhiro mbi 2 milionë lekë në skemën e TVSH- së.
Ministri i Financave dhe Ekonomisë, Arben Ahmetaj, sqaroi dje në Komisionin e Ekonomisë, aplikimin e taksës së ndërtesës me metodologjinë e re të llogaritjes dhe skemën e TVSH- së për biznesin. Për taksën e pronës, kreu i Financave, Ahmetaj, deklaroi se do të jenë rreth 110 mijë familje që nuk do ta paguajnë, duke përfshirë pensionistët e vetëm dhe ato me ndihmë ekonomike. Për pensionistët skema nga përjashtimi i taksës do të jetë e njëjtë me atë të kompensimit të dritave, ku kësaj kategorie i rimbursohen 648 lekë në muaj për energjinë. Do të jenë rreth 83 mijë pensionistë që nuk do të paguajnë taksën e shtëpive. Për kategoritë që përjashtohen nga taksa, ministri Ahmetaj iu referua ndryshimeve në ligjin për taksat vendore. “Projekti mbështetet në ligjin nr. 106 të vitit 2017, që ne e diskutuam së bashku këtu, ‘ Për disa ndryshime në ligjin 9632, datë 30.10.2006’, ‘ Për sistemin e taksave vendore të ndryshuar’. Ky ligj, në nenin 22 të ndryshuar, përcakton subjek- tet që i nënshtrohen taksës mbi ndërtesën, si dhe përjashtimet nga kjo taksë. Janë të përjashtuara banesat sociale dhe qira- marrësit me banesa të paliberalizuara, të gjithë kryefamiljarët që trajtohen me ndihmë ekonomike, pensionistët që jetojnë vetëm ( rreth 110 mijë)”, u shpreh ministri. Ministri Ahmetaj deklaroi se listat e pensionistëve që përjashtohen nga taksa u janë dërguar bashkive nga ISSH. “Databasën e individëve të përjashtuar e kanë të detajuar, në praktikë nuk do t’i lëshohet faturë fiskale. Do t’i shkojë fatura e ujit, por jo e përfshirë taksa. Janë shumë të qartë në bashkëpunim me ISSH, për listën e pensionistëve të vetëm. Ne, si Ministri e Financave dhe Ekonomisë, sërish i kemi kërkuar ISSH që të bëjë updatim të listës në vazhdimësi, sepse është dinamike, nuk diskutohet”, tha Ahmetaj.