REKOMANDIMET E KQZ
Për reformimin e sistemit zgjedhor vendor Në të gjithë këto vite dhe reforma zgjedhore që janë ndërmarrë në Shqipëri, fokusi kryesor është përqendruar në zgjedhjet e përgjithshme, duke mbajtur në të njëjtën status quo dhe duke mos u përpjekur për të reformuar sistemin e zgjedhjeve vendore.
Sidomos në këndvështrimin e barazisë gjinore, sistemi i zgjedhjeve vendore për kryetarin e bashkisë dhe rezultatet që prodhon për gjininë më pak të përfaqësuar, janë thellësisht negative dhe aspak premtuese për përmbushjen e detyrimeve ligjore, detyrimeve ndërkombëtare dhe objektivave madhore të integrimit europian.
Reforma e pritshme zgjedhore është një mundësi shumë e mirë për ta debatuar këtë çështje të rëndësishme. Reformimi i sistemit zgjedhor vendor mund të ndjekë një numër objektivash konkretë:
Të harmonizojë sistemin e zgjedhjeve parlamentare me ato vendore. Shkaqet që çuan Ligjvënësin drejt vendimit për sistemin proporcional në zgjedhjet e përgjithshme janë po aq të vlefshme edhe për zgjedhjet vendore. Një sistem zgjedhor proporcional vendor do përforconte efektin dhe do i plotësonte më shpejt objektivat politiko- ligjore të sistemit zgjedhor të ri;
Të thjeshtojë procedurën e votimit dhe të ulë kostot. Një sistem unik votimi për zgjedhjet vendore do të thotë një votim, në vend të dy votimeve që kemi sot, një fletë votimi në vend të dy fletëve;
Të prioritizojë objektivat për barazinë gjinore në nivelin e qeverisjes vendore dhe t’i japë shanse reale gjinisë më pak të përfaqësuar të drejtojë dhe në nivelin e bashkive ku është ende fenomen i rrallë;
Të eliminojë dualitetin e pushtetit Kryetar - Këshill Bashkiak, i cili jo në pak raste është bërë burim konfliktualiteti ose krizash qeverisjeje në nivel lokal. Demokracia vendore në Shqipëri, dukshëm ndien sot nevojën për rritjen e përgjegjësive dhe rolit të këshillave, shndërrimit të tyre në “parlamente” të mirëfillta vendore, si dhe shndërrimin e kryetarëve në ‘ ekzekutivë” të mirëfilltë, i cili votëbesohet dhe eventualisht humb votëbesimin e Këshillit. Kjo është një zgjidhje adekuate për të rritur llogaridhënien e ekzekutivit lokal.