Gjinushi: Duhet veting edhe për dhënien e doktoraturave
Grupi i punës që ka përgatitur projektligjin për Akademinë e Shkencave ka gati dhe Kodin e Sjelljes për Integritet në Kërkimin Shkencor, i cili do të bëjë dhe verifikimin e doktoraturave. Kreu i grupit të punës, Skënder Gjinushi, tha dje se çdo ankesë për plagjiaturë të doktoraturave, falsifikim apo sajim të kërkimit shkencor do të penalizohet nga gjobë deri në heqjen e gradës shkencore. “Jemi në periudhën e vetingut. Të gjithë e kanë mendjen te penalizimet. Në qoftë se ka firo dhe falsitete në dhënien e doktoraturave, do të ketë profesorë falsë dhe për pasojë akademikë falsë. Do të ketë penalitete deri në heqjen e titullit të gradave”, tha Gjinushi. Në nenin 20 të Kodit të Sjelljes, sanksionohen se cilat janë shkeljet e rënda të integritetit të Kërkimit Shkencor. “Fabrikimi është sajimi i rezultateve të kërkimit shkencor dhe regjistrimi i tyre sikur të ishin të vërtetë; Falsifikimi është manipulimi i materialeve, pajisjeve ose proceseve të kërkimit, heqja e shmangia e të dhënave ose i rezultateve në mënyrë të pajustifikuar; Plagjiatura është përdorimi i ideve dhe punës së të tjerëve, pa cituar burimin origjinal, duke shkelur të drejtat e autorëve dhe produktet e tyre intelektuale”, thuhet në nenin 20 të Kodit të Sjelljes.
Neni 29 përcakton dhe sanksionet ndaj këtyre shkeljeve. “Ndaj personave, qofshin autorë, oponentë apo udhëheqës të punimeve, për të cilët provohet se janë kryer shkeljet e rënda të integritetit të kërkimit shkencor, vendosen sanksione financiare nga 1- 3 milionë lekë dhe me ndërprerjen e kontratës së punës. Për shkeljet e rënda të konstatuara, vendoset heqja e gradës ose e titullit shkencor”, thuhet në nenin 29 të Kodit të Sjelljes.