Pronat me ligjin 7501, Lame: Tokat me abuzime për ish- pronarët
“Pezullimi i regjistrimit të pronave në bregdet për t’u verifikuar”
Pronat abuzive, që janë përfituar me ligjin 7501 në bregdet, pas pezullimit të tapive nga TaskeForca do të përdoren për kompensimin e ish– pronarëve.
Drejtori i përgjithshëm i ALUIZNI- t, njëkohësisht dhe kryetar i bordit të Zyrës së Regjistrimit të Pasurive, Artan Lame, tha dje në një intervistë për ERTV se pronat e tjetërsuara do t’i kthehen të zotit. Lame shpjegoi se këto prona të përvetësuara padrejtësisht do të përdoren nga qeveria për kompensimin e ish- pronarëve dhe për investime në bregdet. “Nuk ka shtetëzim pronash. Pronat e tjetërsuara do t’i kthehen të zotit dhe ky është shteti shqiptar. Shteti shqiptar jemi unë dhe ti. Nuk është se do të shtetëzohen pronat. Në momentin që bie akti me të cilin është vjedhur prona, ato do t’i kthehen komunitetit. Përdorimi i tyre në parim ka dy aktorë të fuqishëm. Një është procesi i kompensimit të ish- pronarëve, që vazhdon të mbetet një nga problemet më të mëdha në lidhje me një padrejtësi historike dhe një legjislacion që nuk është mbyllur asnjëherë. Pra, është përsëri një barrë e kësaj qeverie që po përpiqet të mbyllë procesin e kthimit të pronave, në rastin konkret për t’i përdorur në procesin e kompensimit të ish- pronarëve”, shpjegoi Lame. Sipas kreut të ALUIZNI- t, përdorimi i tokave të përfituara padrejtësisht për turizëm do të mbronin sipërmarrësit, që kërkojnë të investojnë në këtë sektor. “E dyta është, investimet në zonat bregdetare. Flasim për investitorët e fuqishëm, por ku të shkojnë këta investitorë. Dje e paraqita me harta dhe thashë më gjeni në këtë bregdet se ku ka toka të pashqyera në nivelin e parcelave nga 200 dhe 300 metra dhe themi pse nuk zhvillohet turizmi. Ku të zhvillohet turizmi. Ky proces, ndër dëmet më të mëdha që ka bërë është edhe copëzimi në dhjetëra mijëra parcela. Dhe për sa kohë është krijuar kjo fashë që i merr frymën çdo lloj zhvillimi turistik, do të vazhdojë historia si puna e atij investitorit që e rrahën me kopaçe pas kokës, kur tha se do t’i shkonte kësaj pune deri në fund”, u shpreh Lame. Kreu i ALUZNI- t tha se vendimi pezullon regjistrimin në hipotekë të pronave të bregdetit deri sa të përfundojë hetimi. “Thelbi i vendimit është ky: në zonën bregdetare të vendit, nga Buna deri në Kepin Stillo, të pezullohet regjistrimi në hipoteka të titujve të pronësisë i ndarë me ligjin 7501 dhe të bëjmë një verifikim të tyre. Në 7 instanca që duhet të verifikonin këtë proces në gjithë këto 20 vjet ( sepse në 5- 6 vitet e para 7501 për ndarjen e tokës ka funksionuar), procesi ka dështuar. Pas vitit 2000, kur filluan të ndaheshin ato që s’duheshin ndarë, filtrat nuk kanë funksionuar asnjëherë, prandaj mora periudhën 20vjeçare si referencë. Hipoteka ka disa vjet që jep sinjalin se ka probleme. Në një moment të caktuar, kjo problematikë u bë shumë e dukshme, qoftë nga auditet e qeverisë, qoftë nga goditjet e organeve të ndryshme si Prokuroria apo raportet e KLSH- së, saqë askush nuk mund të mbyllte më sytë. Dhe në këtë moment ishte e domosdoshme ndërhyrja e qeverisë”, u shpreh Lame. Kreu i ALUIZNI- t garantoi se tapitë që nuk janë abuzive, nuk do të pezullohen. “Kushdo që e ka marrë me rrugë të ndershme, do të vazhdojë punën dhe ne u themi ‘ puna e mbarë’”, theksoi Lame.