Hyseni: Akuzat për pronat në bregdet, shpifje të opozitës
Deputeti i Partisë Socialiste, Alket Hyseni, ka sqaruar akuzat e ngritura ndaj tij për grabitjen e tokave në bregdet. Hyseni deklaroi se akuzat ishin shpifje të opozitës dhe se pasuria e tij është vënë në mënyrë të ligjshme. “Duke instrumentalizuar një konflikt të brendshëm të një familjeje nga fshati Dhërmi, makineria e baltës së SHQUP- it përpiqet të njollosë figurën time. I kam qëndruar në distancë këtyre akuzave, sepse kam besuar se nuk meritojnë përgjigje këta lloj lehaqensh në ekstazë të diaresë verbale me moton ‘ shpif, shpif, se diçka do ngelet’. Deklaroj me përgjegjësi se çdo akuzë është e pavërtetë, madje, një gënjeshtër e qëllimtë me synime politike të ulëta. Në asnjë qindarkë timen dhe të familjes time, si dhe në asnjë grimcë të pasurive të luajtshme dhe të paluajtshme nuk ka prejardhje të parregullt, të pandershme dhe të pamoralshme. Përkundrazi, është vënë me shumë punë, mund dhe sakrifica. Rrjedh nga një familje njerëzish intelektualë, të ndershëm, punëtorë dhe të re- spektuar”, tha Hyseni. Deputeti i PS- së theksoi se konflikti në fjalë është familjar dhe se ai vetë nuk është i përfshirë. “Opozita ka instrumentalizuar edhe një zonjë për një konflikt që nuk ka lidhje fare me mua. Është një konflikt i brendshëm i një familjeje të cilën as e kam njohur, as nuk kam qenë i përfshirë kurrë, as dëshiroj të jem, sepse nuk më intereson. Familja Bua nga Dhërmiu ka një konflikt të brendshëm prej shumë vjetësh, që lidhet me trashëgiminë. Konflikti ka lindur kur i ka vdekur e ëma. Konflikti ka lidhje me testamentin që ka lënë e ëma dhe një pjesë e familjes, konkretisht, akuzuesja që është kunata, ka pretendimet e saj dhe tashmë i ka ndjekur prej shumë vitesh në çdo shkallë të gjyqësorit deri në Gjykatën Kushtetuese. Kjo nuk ka të bëjë me një pronë që unë e kam marr me të ardhura totalisht të ligjshme dhe e kam deklaruar unë vetë. Çdo qindarkë e kam deklaruar te institucionet ligjzbatuese. Toka nuk lidhet fare me atë që pretendon akuzuesja, pasi ajo tokë është e sekuestruar”, sqaroi deputeti i PS- së.