Gjykata jep 10 vjet burg për biznesmenin Adrian Xhillari

Gjykata e Tiranës ka dënuar me 10 vjet burgim biznesmenin Adrian Xhillari, i cili akuzohet për skandalin me naftën “virgin”. Kështu, ditën e djeshme, Gjykata konkludoi se Xhillari është fajtor për të paktën tri akuza: “fshehje të të ardhurave”, “mospagim taksash” dhe “pastrim parash”. Xhillari u dënua me 15 vjet burg, për shkak të gjykimit të shkurtuar përfiton ulje dënimi në 10 vjet burgim. Gjyqtarja Adriana Bera shpalli të pafajshëm dy të akuzuarit e tjerë, ish- drejtoreshën e doganave, Lula Njebza dhe ishkreun e Doganës së Tiranës, Mirëarbër Teneqexhiun, që akuzoheshin nga Prokuroria e Tiranës për “shpërdorim detyre”. Gjithashtu, Gjykata e Tiranës vendosi që të mbyllë firmën e Xhillarit, “Tea Construction and Petrol”. Vendimi i Gjykatës nuk ishte i kënaqshëm për Prokurorinë, e cila pritet që ta apelojë. Bëhet fjalë vetëm për dy ish- zyrtarët që u shpallën të pafajshëm. I pakënaqur me vendimin ishte edhe avokati i Xhil- larit, i cili paralajmëroi ankimim. Ndërkohë, biznesmeni ndodhet në Gjermani dhe pritet që të ekstradohet shumë shpejt. Në vitin 2015, Adrian Xhillari ka kryer transportin “fiktiv” të sasisë prej 4.406.855 litrash ose 3.251.688 kg të ar- tikullit “naftë virgine” që kompania, që ai drejtonte e kishte depozituar në magazinën fiskale në Kodër- Mëzez, Tiranë, për në magazinën doganore Ballsh. Këto veprime, i ka kryer me dashje direkte dhe me qëllimin e posaçëm për përfituar ekonomikisht duke hedhur për tregtim në mënyrë të paligjshme këtë produkt, që ishte i destinuar detyrimisht për eksport, pasi është i ndaluar për t’u tregtuar në atë gjendje. Në këtë mënyrë ky shtetas, me dashje direkte ka realizuar të ardhura në mënyrë të paligjshme të cilat nuk i ka deklaruar, nuk ka paguar detyrimet tatimore me gjithë mundësinë financiare që kishte, si dhe ka riqarkulluar të ardhurat e krijuara në mënyrë të paligjshme nëpërmjet sistemit bankar. Prokuroria konkludon se sasia totale e naftës së papërpunuar të hedhur në treg ka qenë 3.672.292 kg dhe nga shitja e saj në treg si naftë e përpunuar, ai ka përfituar nga shmangia e tatimeve 242.755.600 lekë.