Reagon klubi i Skënderbeut: Na vranë për interesa private
Klubi i Skënderbeut ka reaguar dje në mbrëmje pas dënimit nga UEFA, teksa ka sulmuar këtë të fundit, duke e cilësuar se me vendimin e marrë ka vrarë kredibilitetin dhe integritetin në komunitetin sportiv ndërkombëtar. Ashtu si qëndrimin e datës 21 mars, kur dhe u bë seanca dëgjimore në UEFA, edhe këtë herë Skënderbeu ka anashkaluar apelimin në qeverinë e futbollit, duke shpresuar vetëm te KAS- i i Lozanës.
QËNDRIMI “Komisioni i Kontrollit, Etikës dhe Disiplinës i UEFAs, shpalli vendimin për përjashtimin e KF Skënderbeut nga kompeticionet europiane për një periudhë 10- vjeçare dhe caktimin e një mase disiplinore financiare në vlerën 1 milion euro. Siç ishte paralajmëruar nga ana jonë më datë 21 mars 2018, vendimi i organit juridik të UEFA- s pritej të ishte i tillë, pasi vetë procedimi në këtë institucion paraqet të meta serioze në lidhje me parimin e pavarësisë institucionale dhe garantimin e të drejtave procedurale të palëve. Përpara këtij vendimi, e vetmja mënyrë për KF Skënderbeun për të mbrojtur punën shembullore të klubit dhe krenarinë e komunitetit sportiv korçar e kombëtar, mbetet apelimi në KAS dhe në Gjykatën e Lartë Federale zvicerane. Është e qartë për të gjithë shqiptarët se drejtësia sportive e UEFA- s është tërë- sisht në funksion të interesave striktërisht private të këtij institucioni dhe të partnerëve të tij. Krenarë për sukseset historike, të cilat janë produkt i meritave, mundit dhe sakrificave tona, KF Skënderbeu mbetet besimplotë se drejtësia e pavarur sportive ose civile do të konfirmojë pafajësinë tonë dhe do të rrëzojë vendimin absurd të Komisionit të Kontrollit, Etikës dhe Disiplinës të UEFA- s. Çmojmë se e vetmja arritje e UEFA- s, përmes këtij procesi, është vrasja e kredibilitetit dhe integritetit të këtij institucioni në komunitetin sportiv ndërkombëtar”, - citohej në komunikatën e klubit korçar në faqen zyrtare në “Facebook”.