Këshilltari i Erdogan në Tiranë: Turqia promovon paqe e vëllazëri
Aktiviteti i radhës më 23 prill, orkestra me 70 fëmijë në Tiranë
Me rastin e Sulltan Nevruzit, festës së ringjalljes së natyrës, Ambasada Turke në Tiranë organizoi një koncert të titulluar “Bota turke me të gjitha ngjyrat e saj”.
Aktiviteti ishte ndërtuar me interpretime artistike të 70 artistëve nga 10 shtete, të cilat kremtojnë këtë festë. Ata pasqyruan nëpërmjet artit të tyre pasurinë e përbashkët të botës turke, siç u shpreh edhe Kryekëshilltari i Presidentit të Republikës turke, Jallçën Topçu. Në këtë aktivitet, ai përcolli përshëndetjen e Presidentit, Recep Tayyip Erdohgan dhe tha se me anë të këtyre festimeve tregohet se si Turqia promovon vëllazërinë dhe paqen. “Ju do të shikoni se si Turqia ka sjellë vëllazërinë, paqen, sigurinë nga Azia në vendet e tjera gjeografike. Me këtë shfaqje do të shikoni edhe njëherë qytetërimin turk”, u shpreh këshilltari i lartë i Presidentit Erdogan. Për promovimin e gjuhës dhe kulturës turke, nëpërmjet këtij aktiviteti, u angazhuan instituti “Junus Emre”, i cili shërben si një urë lidhëse për kultura të ndryshme, si edhe organizata ndërkombëtare kulturore turke “Turksol”. Festimet për Nevruzin janë bërë në pesë vende të ndryshme të Ballkanit. Në vitin 2009, UNESCO e përfshiu festën e Sulltan Nevruzit në listën e trashëgimisë kulturore jomateriale. Turqia po angazhohet për kujtesën e lidhjeve të ngushta me Shqipërinë dhe vendeve të tjera të Ballkanit nëpërmjet aktiviteteve kulturore, por edhe me projekte të shumta infrastrukturore. Në një intervistë në emisionin “Diplomat- icus” në televizionin “News 24”, ambasadori Murat Ahmet Yörük kujtoi se, që me traktatin e vitit 1923, është hartuar “Marrëveshja e Përjetshme të Miqësisë dhe të Bashkëpunimit”, ku një nga vendet nënshkruese është edhe Shqipëria. Edhe ambasadori tha se “dëshiroj sinqerisht që marrëdhëniet dhe kontaktet tona kulturore me rrënjë të thella në shekuj t’i forcojmë me veprimtari kulturore reciproke dhe të nxjerrim më shumë në pah aspektet tona të përbashkëta që me të vërtetë janë shumë”. Ai përmendi institucione si TIKA dhe “Junus Emre”, të cilët çdo muaj do të organizojnë aktiv- itete kulturore në Tiranë dhe qytete të tjera. Aktiviteti i ardhshëm parashikohet të mbahet më 23 prill, me rastin e Festës së Sovranitetit Kombëtar dhe të Fëmijëve që është festë zyrtare në Turqi, ku në Tiranë do të mbërrijë Orkestra Simfonike e Fëmijëve me 70 vetë. Ata janë fëmijë të muzikantëve turq. “Fëmijët e orkestrës sonë, bashkë me vëllezërit e tyre shqiptarë, do të interpretojnë edhe këngë shqiptare të preferuara. Ftoj në këtë veprimtari, e cila do të jetë pa pagesë, të gjithë fëmijët e Tiranës dhe familjarët e tyre”, është shprehur ambasadori.