Protesta, Xhafaj e Marku kërcënojnë: Përgjigje para ligjit
Ministri: Kishte njerëz me rekorde kriminale. Kryeprokurorja: Përgjegjësit do përgjigjen
Prokuroria e Kukësit ka nisur hetimet për protestën në Rrugën e Kombit, ku Policia u përplas me qytetarët që kundërshtojnë vendosjen e tarifave në këtë segment kyç, që lidh Shqipërinë me Kosovën.
Protestuesit dogjën sportelet e firmës private që ka marrë të drejtën e mirëmbajtjes së rrugës dhe vjeljes së tarifës. Në këtë kuadër, Prokuroria e Kukësit ka nisur hetimet për disa vepra penale, si “kundërshtim i forcave të rendit”, “prishje e qetësisë publike”, “shkatërrim prone shtetërore dhe private”. Hetimi nisi pasi Kryeprokurorja Marku doli në një deklaratë për mediat në lidhje me protestën, ku pati përplasje mes Policisë dhe protestuesve. “Prokuroria e Përgjithshme po ndjek me vëmendje ngjarjet e zhvilluara në protestën e paradites së 31 marsit, në segmentin rrugor pranë Tunelit të Kalimashit në Rrugën e Kombit. Prokuroria e Përgjithshme, Kryeprokurorja znj. Arta Marku, uron shërimin e shpejtë të të lënduarve në protestë. Ndërkohë, Prokuroria e Rrethit Gjyqësor Kukës, drejtuesja e saj, Alketa Nushi, me një grup prokurorësh të kësaj Prokurorie, shkuan në vendngjarje dhe po punojnë për të gjetur autorët dhe shkaktarët e dhunës”, thuhet në njoftimin zyrtar. Po kështu, deklarata vijon edhe më tej, ku Kryeprokurorja shprehet e gatshme që të vendosë në shërbim të Prokurorisë së Kukësit të gjitha burimet logjistike të Prokurorisë së Përgjithshme, që të zbardhë ngjarjen dhe të vendosë para ligjit përgjegjësit. Në të njëjtën valë ishte edhe ministri i Brendshëm, Fatmir Xhafaj. Ai dënoi ashpër dhunën në protestë, duke thënë se mes pro- testuesve kishte njerëz me rekorde kriminale, që kishin për qëllim të përshkallëzonin situatën. Ai vlerësoi punën e FNSH- së dhe tha se 12 efektivë ishin plagosur, ku njëri prej tyre ndodhet në spital. “Manifestimi i presupozuar paqësor, u shndërrua menjëherë në një sulm barbar kundër punonjësve të Policisë së Shtetit dhe kundër pronës së përbashkët, publike. Grupe njerëzish të papërgjegjshëm, brenda të cilëve gjendeshin njerëz me rekorde kriminale, shfrytëzuan pabesisht të drejtën për të protestuar paqësisht. Asnjë e drejtë e pretenduar nuk mund të justifikojë në asnjë kohë dhe në asnjë rrethanë, sulmin kundër punonjësve të Policisë së Shtetit dhe shkatërrimin e pronës”, deklaroi Xhafaj. “Janë lënduar 12 punonjës të FNSH- së, nga gurët dhe sendet e përdorura gjatë përleshjes, ndërsa një tjetër është i plagosur rëndë dhe po mjekohet në spital. Vlerësoj qetësinë dhe gjakftohtësinë e treguar nga forcat e Policisë, në përballimin e situatës, që u orientua drejt dhunës, nga elementë që e dëshironin dhe e nxitën atë. U bëj thirrje autoriteteve vendore të Kukësit, që të distancohen nga ky akt i paprecedentë dhe të bashkëpunojnë për të rikthyer normalitetin në qarkullim, në Rrugën e Kombit. Si ministër i Brendshëm, deklaroj se çdokush që nxit dhunën, sulmon forcat e Policisë dhe dhunon pronën publike, do të marrë përgjigjen e merituar. Askush nuk mund të dalë mbi ligjin dhe mbi shtetin”, përfundon reagimi i Xhafajt.