Këshilltarët: FNSH na provokoi, kujdes, mos na acaroni më tej!
“Policia e Kukësit ishte korrekte, shmangi acarimin e mëtejshëm”
Në reagimin e këshilltarëve theksohet se FNSH ka dhunuar pjesëmarrësit që para nisjes zyrtare të protestës. Nga ana tjetër, vlerësohet sjella e Policisë lokale të Kukësit dhe njëkohësisht i kërkohet që të mos procedohen protestuesit, pasi një gjë e tillë do të sillte acarimin e mëtejshëm të situatës. “Ne thirrëm një protestë paqësore civile dhe qytetare, për të cilën insistuam që të jetë e tillë deri në përfundimin e saj. Aktet e dhunës filluan nga ana e Forcave të Ndërhyrjes së Shpejtë, FNSH, para orës së fillimit të protestës. Ka qenë ndërhyrja e vazhdueshme e drejtuesve të protestës për të shmangur dhunën ndaj forcave të Policisë. Aktet e dhunës nga protestuesit erdhën pas acarimit të situatës. Ne distancohemi nga çdo akt dhune, ngado që të vijë. U kërkojmë qytetarëve të Kukesit, Hasit dhe Tropojës, që të sillen në mënyrë paqësore dhe qytetare dhe pas protestës, njëkohësisht duke falënderuar Policinë e Kukësit për sjelljen korrekte të saj, i kërkojmë që të shmangë në maksimum çdo veprim, që mund të çojë në acarime të mëtejshme”, thuhet në reagimin e këshilltarëve, të firmosur nga Kryetari i Këshillit të Bashkisë Kukës, Gjelbërim Shehu dhe Kryetari i Këshillit të Bashkisë Tropojë, Ymer Hoxha. Anëtarët e Këshillit Bashkiak të Kukësit kishin paralajmëruar për zhvillimin e protestës nëse qeveria dhe Parlamenti nuk do të pranonin kërkesën e tyre për përjashtimin nga taksa të banorëve të kësaj bashkie, duke qenë se ata do të përshkojnë këtë rrugë në mënyrë të vazhdueshme. Në mbledhjen e fundit të datës 27 mars, me votë unanime, 17 anëtarët që ishin prezentë, mes së cilëve përfaqësues të PS- së dhe PDsë, nga Këshilli Bashkiak u vendos që t’i kërkohet Kryeministrit Edi Rama dhe Parlamentit, që banorët e Kukësit të përjashtohen nga taksa, që do të hyjë në fuqi së shpejti për të gjithë automjetet që do të kalojnë në Rrugën e Kombit. Por, një kërkesë e tillë nuk u mor parasysh. Gjatë mbledhjes së fundit, këshilltarët e Partisë Demokratike shprehen se tarifat e reja do të varfërojnë më tej banorët e kësaj zone, të cilët e përdorin më shpesh autostradën.