Dhuna, Rama kërcënon protestuesit dhe tërhiqet për kuksianët: Karta dhe abone për banorët
FJALIMI I PLOTE, KRYEMINISTRI PERJASHTON NGA PARTIA KESHILLTARET E PS NE KUKES, PREMTON TARIFA LEHTESUESE
Me mijëra banorë të qarkut të Kukësit, por dhe shumë qytetarë të ardhur nga Kosova, kanë protestuar për rreth tri orë, kundër taksimit të Rrugës së Kombit.
Turma e madhe u grumbullua në Tunelin e Kalimashit, ku ishin vendosur dhe sportelet për pagesën e tarifave për çdo automjet që do të kalojë në këtë rrugë. “Kjo është vjedhje”, brohorisnin protestuesit, duke kundërshtuar taksimin e lartë, që nis nga 2.5 euro për motorët deri në 22.5 euro për kamionët. “Kjo taksë dëmton të gjithë shqiptarët e Kukësit dhe shqiptarët e Kosovës”, u shpreh një prej protestuesve që vinte nga Kosova. Protesta ishte paralajmëruar nga anëtarët e Këshillit Bashkiak të Kukësit, të cilët i kërkuan qeverisë dhe Parlamentit, që banorët e këtij qarku të përjashtohen nga taksimi dhe të rishikoheshin tarifat, pasi kjo gjë do të dëmtojë ekonominë e kësaj zone, e cila është një nga më të varfrat në Shqipëri. Protesta nisi rreth orës 11: 00 dhe u mbyll në orën 14: 00. Pas nisjes së konfrontimit, Forcat e Ndërhyrjes së Shpejtë u tërhoqën në distancë të largët, duke lënë gjithçka në kontroll të protestuesve, duke bërë që protesta paqësore të përshkallëzohet në dhunë. Protestuesit, nga zemërimi, dogjën dhe shkatërruan sportelet e vendosura nga kompania private, që do të mbledhë taksat dhe do të mirëmbajë rrugën e ndërtuar me paratë e taksapaguesve shqiptarë, si dhe nuk lejuan qarkullimin e automjeteve. Madje, ata nuk lejuan as afrimin e zjarrfikësve për shuarjen e zjarrit. Fillimisht, protestuesit u shprehën se do të mbanin të bllokuar rrugën për 24 orë, deri në tërheqjen e qeverisë nga taksa e deklaruar. Por, pas negociatave me Policinë, protestuesit u tërhoqën, duke rinisur kështu qarkullimi i automjeteve pas tri orëve bllokim. Protestuesit akuzuan Policinë se i ka provokuar, gjë e cila, sipas tyre, solli dhe reagimin e tyre të dhunshëm. Në protestë morën pjesë këshilltarët e Bashkisë së Kukësit, njerëz nga të gjitha partitë politike, shoqata “Biznesi për Biznesin”, banorët e Kukësit dhe pushteti vendor. “Asgjë nuk ishte e planifikuar për dhunë, por Policia na provokoi duke dhunuar protestuesit”, shprehet një prej pjesëmarrësve. “Kemi marrë iniciativën për t’i dalë zot kësaj proteste. Këtu jemi mbledhur pa asnjë dallim politik. Policia na dhunoi me shkopinj gome. Të hiqet taksa, kjo është një kërkesë e drejtë dhe jetike”, shprehet një banor i Kukësit. “Taksa dëmton rëndë biznesin në Kosovë, por edhe lëvizjen e qytetarëve të thjeshtë”, deklaroi një qytetar i Kosovës, që iu bashkua protestës. “Është rruga me bashku kombin, nuk është rruga e Ramës, nuk është rruga për të bërë gropën”, tha një tjetër protes- tues i zemëruar. Rruga e Kombit ka një gjatësi prej 110 kilometra dhe nis nga Miloti deri në Morinë, kufi me Kosovën. Një konsorcion ndërkombëtar pritet që të përfundojë rrugën që lidh Shqipërinë me Kosovën, të mirëmbajë rrugën, si dhe të vjelë taksën për një periudhë 30- vjeçare.