Avokati i Popullit inspekton qelitë ku mbahen të arrestuarit
Avokati i Popullit ka zhvilluar të dielën dhe ditën e djeshme vizita inspektuese në dhomat e paraburgimit, ku janë sjellë qytetarë të ndaluar pas pjesëmarrjes në protestën te Rruga e Kombit. Mësohet se inspektorët e Avokatit të Popullit u kanë kërkuar autoriteteve policore që të bëjnë trajtimin ushqimor dhe shëndetësor të të ndaluarve, që ndodhen në mjediset e paraburgimit për të shmangur klasifikimin e gjendjes së tyre si trajtim çnjerëzor. “Është një e drejtë e padiskutueshme e çdo qytetari ajo për t’u organizuar dhe kundërshtuar vendime të padrejta apo të debatueshme të autoritetit qeverisës. Megjithatë, dhuna si mjet kundërshtimi ndaj një padrejtësie duhet shmangur në të gjitha rrethanat”, thuhet në deklaratën e Avokatit të Popullit. Gjithashtu, theksohet edhe nevoja për përgjegjshmëri dhe vetëpërmbajtje edhe nga ana e organeve të ruajtjes së rendit, duke kon- sideruar se përgjigjja me dhunë ndaj dhunës, prodhon vetëm spirale të pafundme dhune. “Ekspertë të Avokatit të Popullit, gjithsesi do të hetojnë me kujdes në ditët në vijim të gjitha procedurat e ndjekura nga autoritetet policore gjatë zhvillimit të protestës së sotme, për të verifikuar çdo tejkalim kompetence apo shkelje të manualëve të sjelljes së policisë kundrejt qytetarëve protestues. Çështja e vendosjes së një tarife mirëmbajtjeje për Rrugën e Kombit është prej disa ditësh objekt i një hetimi administrativ nga ana e Institucionit të Avokatit të Popullit. I gjithë procesi i vendimmarrjes për tarifimin e një segmenti rrugor kombëtar dhe administrimin e tij nga një kompani private, do t’i nënshtrohet një shqyrtimi të hollësishëm për të parë nëse kemi në këtë rast shkelje të së drejtës universale të njeriut për lëvizjen e lirë”, thuhet në deklaratë.