Shoqatat e Biznesit, kundër dhunës në protestë
Dhomat e Tregtisë: Dënojmë çdo akt vandal ndaj sipërmarrjes
Forumi i Dhomave të Tregtisë dhe Shoqatave të Sipërmarrjes dënuan aktet e dhunës në protestën e ditës së shtunë kundër taksës për Rrugën e Kombit. Kryetarja e Unionit të Dhomave të Tregtisë, Ines Muçostepa, në konferencën e djeshme për shtyp u shpreh kundër dhunës ndaj sipërmarrjes, ndërsa kërkoi hapjen e dialogut mes qeverisë dhe koncesionarit për vendosjen e skemave lehtësuese të përdoruesve të shpeshtë. “Dënojmë rëndë çdo akt vandal dhe të jashtëligjshëm ndaj sipërmarrjes private shqiptare, e cila në rastin konkret ka pësuar një dëm prej miliona eurosh. Duke u nisur nga sa ndodhi dhe duke marrë parasysh shqetësimin e bizneseve të prekura në lidhje me tarifat, kërkojmë që të hapet dialogu mes qeverisë dhe sipërmarrjes së interesuar për një mirinformim dhe për të parë skemat e lehtësimit të impaktit të tarifës për përdoruesit e shpeshtë. Ne kundërshtojmë me forcë çdo akt dhune, vandalizmi ndaj çdo sipërmarrësi”, u shpreh Muçostepa. Presidenti i “Bi- znesAlbania”, Luan Bregasi u shpreh se ekzistojnë hapësirat për rinegocim të tarifës për ato kompani që zhvillojnë aktivitet të shpeshtë në Kosovë. “Ne jemi një vend që nuk jemi mësuar të paguajmë taksën e rrugës. Nga kjo pikëpamje, sado e ulët apo e lartë të konsiderohet, pasi ende nuk e dimë nëse është e ulët apo është e lartë, për shkak të mungesës së eksperiencës dhe traditës që ka Shqipëria në vendosjen e taksës së infrastrukturës së rrugës. Në impaktin e parë te biznesi është krijuar përshtypje se taksa është e lartë dhe reagime kemi pasur nga mjaft kompani private. Përtej kësaj, edhe në bisedat që janë zhvilluar sot edhe me koncesionarët, nga fryma që kemi kuptuar edhe nga Kryeministri Rama, janë lënë hapësira që për kompani që do të kenë trafik të dendur në shkëmbimet ekonomike tregtare me Kosovën, tarifa do të rishikohet dhe do të rinegociohet me ato kosto që do të jenë të përballueshme nga kompanitë që zhvillojnë aktivitet në Kosovë”, u shpreh Bregasi. Kryetari i Dhomës së Tregtisë së Tiranës, Nikolin Jaka, theksoi se do të negociohet me koncesionarin për ulje të tarifës pas 6 muajsh, duke analizuar edhe lëvizjen e frekuencës për përdoruesit e shpeshtë tregtarë. Jaka kërkoi të shmangen sloganet, që nuk i shërbejnë ekonomisë dhe investimeve. “Sot nuk ka oligarkë, por kanë qenë sipërmarrës që kanë qenë që në kohën e një klase politike apo një klase tjetër politike. Në qoftë se do të kalojmë në slogane që nuk i shërbejnë stabilitetit, qëndrueshmërisë, investimit dhe ekonomisë, ku është sinjali që transmetohet sot te qytetari apo te investitori të huaj, që pretendon t’i sjellë investimet në vend?”, u shpreh Jaka.