“Mund të hetohet edhe Presidenti Thaçi”
Kryeprokurori pret kërkesën e Haradinajt për rastin e gylenistëve
Kryeprokurori i Kosovës, Aleksandër Lumezi, u zotua se do të jetë i pakompromis kundër të gjithë atyre, që kanë gisht në rrëmbimin dhe arrestimin e gjashtë shtetasve turq. Ai tha se nuk do të kursejë asnjë prej zyrtarëve të shtetit, përfshirë këtu edhe Presidentin Thaçi. Në një deklaratë për gazeta “Express”, Lumezi tha se sapo të marrë zyrtarisht kërkesën e Haradinajt për rastin e gylenistëve, do të fillojë menjëherë me hetime. Lumezi është caktuar që të udhëheqë ekipin për nisjen e hetimeve rreth rastit të arrestimit dhe deportimit të gjashtë shtetasve turq nga Kosova. Gjashtë gylenistët u morën me një avion special nga shërbimi sekret turk MIT, por Lumezi thotë se do hetojë përfshirjen e zyrtarëve të shtetit të Kosovës në këtë aferë.
“Zyrtarisht, ende nuk e kam marrë kërkesën për hetim... Në bazë të shkresës, ne do të veprojmë. Do të sigurohemi se a ka elemente për ndonjë vepër penale. Në bazë të grumbullimit të informacioneve, ne do të shohim se cilët zyrtarë shtetërorë janë përgjegjës lidhur me dëbimin e shtetasve turq”, është shprehur Lumezi. Duke e komentuar shkarkimin e ministrit të Brendshëm Flamur Sefajt dhe drejtorit të AKI- së, Driton Gashit, Kryeprokurori tha: “Për ne nuk është i mjaftueshëm shkarkimi, ne shohim nëse ata kanë kryer ndonjë vepër penale. Duhet të diskutohet parimi i ligjshmërisë. Nëse ata kanë kryer ndonjë vepër penale, atëherë ne edhe do të veprojmë. Ne, tash do të nisim me grumbullimin e informatave dhe të dhënave dhe pas këtyre do të shohim se a ka bërë ndonjëri nga këta zyrtarë shtetërorë vepër penale”, ka shtuar Kryeprokurori.