Dhurata e Qeverisë turke, mamografi falas në Tiranë
Zv. ministri Ogutken: Kurim pa pagesë për të prekurat nga tumori
Qeveria turke mbështet Ministrinë e Shëndetësisë në zbatimin e dy nismave me rëndësi: “autoambulanca rozë” dhe trajnimi i mjekëve dhe infermierëve për urgjencën mjekësore. Në javën e shëndetit, “autoambulanca rozë” ka rrugëtuar nga Turqia në Shqipëri, do të ofrojë për 3 ditë shërbimin e mamografisë dhe paptestit falas për gratë në sheshin “Skënderbej”, nga mjekë turq dhe shqiptarë. Në ceremoninë e çeljes së kësaj nisme ishin të pranishëm ministrja e Shëndetësisë dhe Mbrojtjes Sociale, Ogerta Manastirliu dhe zv. ministri i Shëndetësisë së Turqisë z. Ahmet Baha Ogutken. Ky i fundit deklaroi se programi që mbështesin u vjen në ndihmë grave shqiptare, të cilat mund të parandalojnë në kohë sëmundjet tumorale. Por nuk bëhet fjalë vetëm për diagnostikim, por edhe kurim nga staf i specializuar. “Shpresojmë që të gjitha gratë të rezultojnë të shëndetshme nga këto ekzaminime, por nëse do të ketë gra që do të kenë probleme që lidhen me tumoret, ne do të garantojmë kurimin e një pjese prej tyre”. Për ministren tonë të Shëndetësisë, çdo investim i bërë për parandalimin është një investim për shëndetin. “Dua ta shfrytëzoj këtë mundësi për të rikthyer edhe një herë vëmendjen te rëndësia që ka parandalimi i hershëm i sëmundjeve, posaçërisht sëmundjeve tumorale sepse shpëton jetë! Ndaj, dua të bëj një ftesë për të gjitha gratë që të mos e neglizhojnë kontrollin për kancerin e gjirit dhe kancerin cervikal, që për fat të keq, janë shkaktarët kryesorë të vdekjeve nga kanceri te gratë në Shqipëri. Tashmë e kemi filluar parandalimin e kancerit të gjirit me programin e mamografive të lëvizshme falas në gjithë Shqipërinë”, nënvizoi Manastirliu duke vënë theksin te zgjerimi i programeve parandaluese të shërbimeve në komunitet përmes mamografive lëvizëse, jo vetëm në kryeqytet, por në të gjithë vendin. Për të gjithë të interesuarat, “autoambulanca rozë” do të jetë në sheshin “Skënderbej” nga ora 09: 0018: 00 për të ofruar shërbimin e mamografisë dhe paptestit falas.