Rama akuza PD: Protesta kundër integrimit
Kryeministri: Duan zjarr e kaos për t'i ikur drejtësisë
Kryeministri Edi Rama ka akuzuar dje opozitën se po përdor pagesën e Rrugës së Kombit për të bllokuar rrugën europiane të Shqipërisë. Në një status në "Facebook", Rama ka deklaruar dje se opozita kur ishte në pushtet kërkonte ta bënte pagesën e rrugës 8 deri në 9 euro, por dështoi dhe tani sipas tij, po kërkon të shfrytëzojë rastin për të ardhur në pushtet. Për kryeministrin tjetër qëllim është se Partia Demokratike kërkon t'i ikë drejtësisë, duke përdorur zjarrin dhe kaosin. "Kur ishin në qeveri e bënë tenderin e pagesës së rrugës 8- 9 EU! Dështuan. Tani i vunë zjarrin "patriotik" e duan ta përdorin Kukësin si shishe benzine për të djegur rrugën europiane të Shqipërisë! Mjerë kush u beson rrugëhumburve pa atdhe, që duan zjarr e kaos për t'i ikur drejtësisë!", ka thënë dje Rama. Deklaratat e Kryeministrit i ka përforcuar numri dy i Partisë Socialiste. Taulant Balla, në një prononcim për mediat, ka thënë se opozita me këtë qëndrim kërkon të pengojë marrjen e statusit të vendit kandidat në BE. Sipas tij, deklaratat për mosbindje civile janë të paligjshme, por ka si qëllim shmangien e problemeve me drejtësinë për financimet ruse. "Është e paligjshme që një politikan u bën thirrje qytetarëve të mos paguajnë taksat, kur ndërkohë mbi ba- zën e tyre funksionon buxheti i shtetit, funksionojnë të ardhurat, funksionojnë shkollat, funksionojnë qendrat shëndetësore, funksionojnë spitalet. Të thuash mos paguani taksat, do të thuash që të mbyllim spitalet, do të thuash që të mbyllim shkollat. Megjithatë, në papërgjegjshmërinë e vet të Lulzimit, që të gjithë e dimë se hall i madh e ka zënë, po të kemi parasysh disa fatalitete që e presin lidershipin e Par- tisë Demokratike në ditët dhe në javët në vijim, çështja e financimit rus, të gjithë e dimë se procesi i hetimit po ecën dhe Lulzim Basha nuk duhet të vonojë të japë dëshmitë e veta për këtë çështje", ka thënë dje Balla. Sipas tij, më datë 17 pritet vendimi pozitiv për çeljen e negociatave me BE- në, ndërsa opozita ka përshkallëzuar qëndrimin. "Më datë 17 prill, të gjithë shqiptarët presin një lajm të mirë për Shqipërinë dhe për aspiratën tonë për integrim europian. Ky përshkallëzim i sjelljes së opozitës ka të bëjë pikërisht me të gjitha pritshmëritë që Komisioni, në mesditën e 17 prillit, do të rekomandojë hapjen e negociatave të Shqipërisë me BE, pa asnjë kusht. Ky është një lajm shumë i mirë për të gjithë shqiptarët, por nuk është një lajm i mirë për treshen Berisha- Basha- Kryemadhi, të bërë bashkë pikërisht nga një arsye që të gjithë shqiptarët e dinë", ka thënë dje kreu i grupit të PS- së.