Kokaina, kapen 5 shqiptarë, pranga dhe një gruaje
Gjatë kontrolleve u sekuestrua kokainë dhe armë
GREQI - Shkatërrohet banda e kokainës në Athinë. Në pranga 5 shqiptarë, mes tyre një femër, dy të tjerë në kërkim. Një grup i shpërndarjes së kokainës është shkatërruar nga Policia greke në Athinë paraditen e së martës, ku gjatë operacionit u sekuestrua drogë dhe armë. Për rrjedhojë, në pranga kanë përfunduar pesë shqiptarë të moshës 31- 35 vjeç, mes tyre edhe një femër 31- vjeçare, që vepronin në zonat Smyrna, Kalithea dhe Larisa. Përveç pesë të arrestuarve, në kërkim policor janë shpallur edhe dy shqiptarë të tjerë. Gjatë kontrollit të ushtruar nga forcat e policisë nëpër dyqane dhe banesa të personave të arrestuar u sekuestrua një sasi prej 436 gramësh drogë e llojit kokainë, 300 gramë përzierës, 2 mijë euro, 3 peshore, 2 pistoleta me fishekë, 2 makina si dhe 14 celularë. Nga hetimet policore mësohet se banda shqiptare e kokainës funksiononte sipas një hierarkie dhe të përcaktuara mirë edhe rolet e secilit prej anëtarëve të saj, si ata që merreshin me magazinimin e drogës, shitjen dhe shpërndarjen. Ndërkohë që janë identifikuar edhe vendet ku mbahej droga, e fshehur në një dyqan në Kalithea dhe Larisa. Udhëheqësi i bandës ishte një 34- vjeçar, identiteti i të cilit nuk bëhet i ditur. 34- vjeçari shqiptar ishte përgjegjës për gjetjen e sasive të kokainës dhe drejtonte anëtarët e tjerë në mënyrë që droga të ruhej në vende të përshtatshme. Ndërkohë që, përgjegjës për ruajtjen dhe gjetjen e përdoruesve për Atikën ishte një 35vjeçar dhe për rajonin e Larisës një shqiptar 32- vjeçar, bëhet e ditur nga Policia greke. Pesë shqiptarët e arrestuar janë dërguar në bur- gun e Athinës dhe tashmë ndaj tyre do të nisë një hetim më i thelluar nga Prokuroria e Athinës, ndërkohë që Policia po punon për kapjen e dy shqiptarëve të tjerë të shpallur në kërkim.