FLET DREJTORESHA E ATP Pronat, afat i ri për 4224 dosje pa faturë financiare
Drejtoresha e ATP, raport para Kuvendit: 4224 aplikimet para ‘ 96 janë pa faturë financiare. Afatet e plotësimit të dokumenteve dhe çmimi i kompensimit
Drejtoresha e Përgjithshme e Agjencisë së Trajtimit të Pronave, Jonida Baçi, ka bërë të ditur dje se kanë mbetur pa vlerësuar për kompensim financiar 4224 dosje të vitit 1996.
Gjatë raportimit në Komisionin e Ligjeve, drejtoresha e ATP- së bëri të ditur se këta aplikantë kanë afat 6 muaj për të plotësuar dokumentacionin për 4224 dosjet, në mënyrë që të përfitojnë vlerën e kompensimit maksimal financiar. “Në këtë kuadër, përgjatë vitit 2017- të ATP- ja ka vijuar me vlerësimet financiare të vendimeve përfundimtare, të cilat kanë njohur të drejtën e pronës për vitet ‘ 95 dhe ‘ 96 në të gjithë Republikën e Shqipërisë. Specifikisht kanë kaluar në procesin e verifikimit dhe vlerësimit 6941 vendime të vitit 1995 dhe 4877 vendime të vitit 1996, që kanë njohur të drejtën e pronës për kompensim. Ku në fakt, të vlerësuara financiarisht janë 6042 vendime me një vlerë financiare prej rreth 39 miliardë lekësh, ndërsa 4224 vendime nuk është bërë e mundur realizimi i vlerësimit financiar për shkak se nuk ka dokumentacion të plotë ligjor dhe hartografik, që mundësojnë përcaktimin e zërit kadastral të origjinës”, tha dje drejtoresha Jonida Baçi. Në rast se këto familje nuk i plotësojnë brenda afatit gjashtëmujor, atëherë sipas drejtoreshës së ATP- së, rrezikojnë që të përfitojnë kompensim minimal financiar. “Për këto vendime subjektet e interesuara mund të plotësojnë dokumentacionin e nevojshëm për vlerësimin financiar të vendimit brenda një afati prej 6 muajsh nga data e publikimit të regjistrit. Pas kalimit të këtij afati për depozitimin e dokumentacionit shtesë të nevojshme për vlerësimin financiar në bazë të pikës 4 të nenit 16 të ligjit nr. 133 të vitit 2015, këto vendime vlerësohen financiarisht me çmimin minimal të hartës së vlerës”, ka thënë dje Baçi.
KOMPENSIMI Agjencia e Trajtimit të Pronave, sipas drejtoreshës së Përgjithshme, ka vlerësuar deri më tani 61% të dosjeve të depozituara pranë këtij institucioni. Në raportin e saj, Jonida Baçi tha dje se janë vlerësuar 15.856 dosje nga 26 mijë dosje që janë në total. “Për 2017- ën janë rivlerësuar dhe publikuar 118 vendime për periudhën ‘ 93-’ 94, të cilat i shtohen në total numrit të vendimeve të vlerësuara. Gjithashtu, bëj me dije se përgjatë procesit të vlerësimit, 1.243 vendime rezultojnë të ezaurur ose kompensuar. Vendimet konsiderohen të kompensuar kur ka ndryshim të zërit kadastral të origjinës së pronës dhe subjekti pa përfituar kthim fizik me vendime të mëparshme dhe nga përllogaritjet sipas metodologjisë që përcaktohet në ligj, rezulton se vlerësimi financiar i pronës është më i vogël se vlerësimi financiar i pronës së kthyer. ATP- ja që prej fillimit të procesit ka verifikuar dhe vlerësuar gjithsej 15.856 vendime nga 26 mijë totale, të deklaruara ose 61 % të dosjeve. Vetëm për janardhjetor 2017 janë vlerësuar 11.936 vendime”, u shpreh Baçi. FINANCIMI Duke folur për fondin fi- nanciar të akorduar për të kompensuar dosjet e pronarëve, drejtoresha e ATP- së tha se në vitin 2017- të është shpërndarë i gjithë fondi në dispozicion. Sipas saj, ATP ka lëvruar fondin prej 2.4 miliardë lekësh. “Në vitin 2017- të buxheti i ka akorduar një fond prej 1.5 miliardë lekësh nga 3.3 miliardë lekësh që parashikohej në ligj. Këtij fondi i është shtuar fondi i mbartur i vitit 2016- të prej 1.4 mil- iardë, ku në total fondi i kompensimit për ATP është 2.54 miliardë lekë. ATP ka ekzekutuar 183 kërkesa nga 887 kërkesa të administruara pranë saj. Më specifikisht, 145 kërkesa kanë përfituar vetëm kompensim financiar në vlerën rreth 1 miliardë lekë, 15 kërkesa kanë përfituar kompensim financiar dhe fizik, 7 kërkesa vetëm kompensim fizik rreth 5.6 ha”, ka thënë para deputetëve, Jonida Baçi.