Policia para Gjykatës, 1 km kordon kundër protestuesve
Incidentet, gjakoset Spaho, Noka kap për fyti policin
Mëngjesi i së mërkurës nuk qe një ditë e zakonshme në Tiranë. Një pjesë e bulevardit “Gjergj Fishta”, gati 1 kilometër, ishte bllokuar që herët dhe në të ishin vendosur të organizuar forca të shumta policie.
Heshtja që gërshetohej me pëshpëritjet e tyre nuk i përngjante aspak panoramës së vizitës së Papa Franceskut në Tiranë apo të ndonjë personaliteti të lartë të botës Perëndimore, që kur viziton Shqipërinë, priten fjalë të mira dhe jepen buzëqeshje për mikpritje. Këtë herë kishte shumë fytyra të ngrysura. Segmenti nga kryqëzimi i Drejtorisë së Policisë së Tiranës deri në kryqëzimin e “21 Dhjetorit” ishte rrethuar nga të gjitha anët. Në çdo rrugicë prapa tij kishte efektivë policie, plot 1000 të tillë ishin mobilizuar për mbarëvajtjen e një procesi gjyqësor ndaj 23 protestuesve. Në mjediset e Gjykatës së Tiranës, 23 protestuesit e Rrugës së Kombit do të mësonin masat e sigurisë ndaj tyre. Duket se jo të gjithë e prisnin gjithë këtë përforcim të godinës së Gjykatës së Tiranës, e cila u mor hua pjesërisht nga simotra e Kukësit. Banorët e zonës u detyruan të devijonin rrugën dhe lëvizja e automjeteve u bllokua. Heshtja nisi të zbehej dhe pëshpëritjet nuk dëgjoheshin më kur në krahun tjetër të “Lanës”, te “Vasil Shanto”, nisën të grumbullohen rreth 20- 50 protestues, kryesisht familjarë të të arrestuarve, por edhe disa pjesëtarë të shoqërisë civile. Nën thirrjet “Rama ik” dhe “Lironi shokët tanë” në krahun tjetër, në godinën e Gjykatës, deputetë të opozitës zhvendosën vëmendjen e Policisë. Ishte ora 09: 10 kur në portën kryesore të godinës nisi edhe mosmarrëveshja e zakonshme. Deputetët kërkonin të hynin dhe Policia nuk i lejonte. Në këto raste debatet zor se përfundojnë me marrëveshje dhe nuk kaluan shumë kur skena të njohura u shfaqën. Një familjar i protestuesve gati e shkuli derën e brendshme të Gjykatës, ndërsa deputeti Noka kapi prej fyti njërin prej punonjësve të policisë. Debatet burrërore nuk i zbuti as prania e deputeteve femra dhe Edmond Spaho doli me njolla gjaku në këmishë nga dera e Gjykatës. Por gjakrat u qetësuan shpejt pas një telefonate të deputetëve me drejtorin e Policisë dhe Gjykata vendosi që ta hapte seancën për deputetët. Rreth orës 09: 30 seanca nisi dhe heshtja dukej sikur po rikthehej, por jo. Protestuesit në anën tjetër të rrugës bllokuan qarkullimin e mjeteve duke u ulur këmbëkryq. Mesazhet ishin të qarta, “jo dhunës” dhe “solidaritet me të arrestuarit”. Kësaj të fundit iu përgjigjën edhe disa prej drejtuesve të bllokuar në trafik, të cilët pasi morën ndjesën e sinqertë për shqetësimin, u ranë borive disa herë me kërkesë të protestuesve. Për disa orë me radhë protestuesit ishin vëmendja kryesore e ditës, por asnjëherë nuk ngacmuan efektivët e policisë. Ndërkohë, në anën tjetër, në godinën e Gjykatës, muri rrethues i policëve edhe zbutej përpara ndonjë kamerieri që u sillte kafet të pranishmëve në seancë. Dukej se do të ishte një ditë e gjatë dhe kështu qe. Ristani, Spaho, Strazimiri, Nora Malaj, Kejdi Mehmetaj, Ivi Kaso hynin dhe dilnin në oborrin e Gjykatës teksa seanca vazhdonte. Në krahun tjetër, protestuesit, edhe pse të pakët, nuk ndaluan për asnjë moment së përkrahuri të arrestuarit. Pas 6 orësh e gjysmë, Gjykata më në fund e tha fjalën e saj, por vendimi u përbuz. Deputetët e opozitës e quajtën një turp, ndërsa gjyqtarja u largua nxitimthi nga salla. Vendimi nuk u prit mirë as nga protestuesit, të cilët nuk e pranuan as ngushëllimin e opozitës. Ata u larguan kokulur, por jo të dorëzuar, ndërsa opozita njoftoi protestën e sotme. Ajo që vlen të theksohet është se nuk pati dhunë jashtë Gjykatës, por vetëm incidente brenda saj, ku ishte e pranishme politika.