Negociatat me koncesionarin, ministriAhmetaj: Do ketë përjashtime dhe ulje të tarifës

Braçe: “Qeveria nuk komunikoi me banorët, kuksianët të përjashtohen nga taksa”. Ministri: “Paketë solidariteti”

Qeveria ka nisur negociatat me koncesionarin e Rrugës së Kombit për zbutjen e tarifës së kalimit për qytetarët e zonës.

Ministri i Financave dhe Ekonomisë, Arben Ahmetaj, deklaroi dje në seancën dëgjimore të Komisionit të Ekonomisë, se negociatat e nisura pritet të përfundojnë brenda 1 muaji ku do të shpallet dhe një paketë solidariteti. Ministri Ahmetaj tha se paketa sociale synon të mbrojë banorët e zonës dhe përdoruesit e shpeshtë. “Autoriteti kontraktor dhe koncesionari kanë më shumë se 1 muaj që diskutojnë se çfarë përqasje sociale do të bëjnë për banorët e Kukësit, Hasit dhe Tropojës. Në përfundim të këtyre negociatave, Kryeministri shumë shpejt do të shpallë dhe paketën sociale. Kjo paketë ka 1 muaj e gjysmë që diskutohet në bazë të nenit të negociuar në kontratë. Mbrojtja sociale nga qeveria do të bëhet me shumë vëmendje, si pjesë e paketës së solidaritetit që kjo qeveri nuk e ndan”, tha ministri. Kryetari i Komisionit të Ekonomisë, Erjon Braçe, kërkoi që tarifa e kalimit të mos paguhet nga banorët që jetojnë afër rrugës dhe nga autobusët e transportit publik. “Qeveria nuk komunikoi me banorët. Rruga ka marrë karakter urban, ndaj kategori të caktuara qoftë përdoruesish, banorë të zonës që hyjnë e dalin për 5 km duhet të përjashtohen nga pagesa e asaj tarife. Mjetet e transportit urban, pra, për autobusët dhe mjetet e tjera, a është i përjashtuar apo jo dhe a po e negocioni me koncesionarin të përjashtohen, që të mos ndikojë në çmimin e biletës të banorëve”, u shpreh Braçe. Ministri Ahmetaj garantoi se në mbyllje të negociatave mund të përfshihen përjashtime nga tarifa dhe ulje të saj. “Duke iu referuar procedurës së diskutimit të qeverisë me koncesionarin, në bazë të kontratës për të krijuar një paketë sociale ku mund të përfshihet ajo që ju specifikisht thatë për ata banorë që shkojnë në shtëpi, po diskutohet dhe patjetër koncepti i përdoruesit të shpejtë dhe do të krijojë një lehtësi për banorët e zonës. Ju garantoj që sot që flasim, autoriteti kontraktor me urdhër të Kryeministrit është në negociata intensive. Në përfundim të negociatave kur të shpallen mund të përfshihen edhe përjashtime, edhe ulje e konsiderueshme çmimi”, u shpreh Ahmetaj. TAKSA E QARKULLIMIT

Ministri i Financave dhe Ekonomisë, Arben Ahmetaj, tha se 42 milionë dollarë të taksës së qarkullimit shkon për pagesat e borxhit për Rrugën e Kombit. Ahmetaj sqaroi se në vit arkëtohen 120 milionë dollarë taksë qarkullimi, që nuk mjafton as për pagesat e borx- hit të rrugës. “Pagesat për borxhet e marra për rrugët, në vitin 2018 do të shkojë 110 milionë dollarë, nga të cilat 42 milionë dollarë janë pagesat për borxhet e marra për Rrugën e Kombit apo 37 për qind të totalit të pagesave të borxhit të rrugëve. Në qoftë se taksa e qarkullimit mbledh 120 milionë dollarë, gati e njëjta shumë shkon për pagesën e borxhit. Paratë e taksës së qarkullimit nuk mjaftojnë as për të paguar borxhet që janë marrë për rrugët, ku vetëm interesat e principali shkojnë 120 milionë dollarë, kaq është dhe taksa e qarkullimit”, u shpreh Ahmetaj.