“Si mund të shpallet projekti i një ndërtese publike pa konkurs?!”

Pjesë e takimit të djeshëm me Presidentin Ilir Meta, ka qenë edhe Stefan Çapaliku, për të cilin është e patolerueshme vendosja e një projekti pa konkurs. Ja çfarë ka thënë ai:

Si mundet që projekti i një ndërtese publike të shpallet duke mos qenë rezultat i ndonjë konkursi. Kjo është jashtë çdo koncepti demokratik. Si mundet që një objekt publik t’i delegohet një studioje, pavarësisht famës që ka. Unë jam krejtësisht i bindur, edhe për këtë kam referenca, se çdo studio arkitektonike në Europë është e interesuar, që të marrë pjesë në një konkurs, që ka për qëllim ndërtimin e një Teatri Kombëtar. Teatrot kombëtarë ndërtohen kaq rrallë, edhe është kaq atraktive për studiot e arkitekturës, saqë nuk do të linte indiferente asnjë prej tyre. Ata që quhen “yjet e arkitekturës” ( Stararchitects) janë absolutisht të interesuar që të jenë pjesë e një konkursi të tillë. Shtoji kësaj edhe problematikat, që e ashtuquajtura projekt- ide e paraqitur si plagjiaturë e studios ukrainase “Forma”, e bën këtë gjë skandaloze dhe krejtësisht të turpshme. Nëse diçka e tillë do të ndodhte në një vend perëndimor, do të kishin dhënë dorëheqjen të gjithë ata që e kanë organizuar një skifo të tillë.

Vetëm në Shqipëri turpi hahet me bukë. Vetëm Shqipëria prodhon aq bukë, sa për të ngrënë të gjithë turpet e botës. Ajo është një furrë e madhe buke e gatshme për të ngrënë turpet e veta.

Unë vazhdoj që të jem i mendimit se TK mund të restaurohet, të prishet edhe të rindërtohet nga fillimi, mundet që të bëhen çdolloj adaptimesh arkitektonike dhe të zbatohen alternativa që vijnë vetëm përmes konkursesh.