Të dhënat, mësuesit e rinj janë “nxënës të këqij”
Nikolla: Ka fakultete ku shumica janë me mesatare nën 7
Cilësia e mësuesve që edukojnë brezat e rinj nuk është në nivelin e duhur, e madje shpesh lë për të dëshiruar.
Kjo, referuar notës mesatare hyrëse të atyre që zgjedhin një fakultet edukimi, pa llogaritur formimin në përfundim të universitetit, që reflektohet në provimin e licencës. Këtë e vë në dukje edhe ministrja e Arsimit, Lindita Nikolla, e cila thotë se ka fakultete ku shumica e mësuesve vijnë nga gjimnazi me një mesatare pak më të lartë se pragu hyrës në universitet. “Ka universitete që shifra e mësuesve me notë mesatare nën 7 apo të pranuarve në vit të parë me notë mesatare nën 7, është edhe mbi 50%”.
ANALIZA Ministria e Arsimit ka bërë një analizë të hollësishme për të gjitha fakultetet e mësuesisë, duke u ndalur në nivelin e studentëve që në gjimnaze. Të dhënat nuk janë aspak të kënaqshme. “Ne kemi bërë në fakt me shumë kujdes gjithë projeksionet, kemi parë analizat në rang numrash në fakt, për të gjithë institucionet që ofrojnë programet nga ku prodhohen mësues. Shohim që 65 % e të gjithë të pranuarve në të gjithë universitetet tona në programet e mësuesisë, janë me notën mesatare nën 8 dhe 23% janë me notën mesatare nën 7, këto janë referenca duke pasur parasysh të gjithë institucionet e arsimit të lartë. Ndaj, këto kërkojnë qartësi, patjetër studimin e duhur, seriozitetin e duhur, por edhe një vullnet të shprehur që secili prej aktorëve në këtë proces të bëjë vetë detyrat e shtëpisë”. Situata paraqitet më e zezë në universitetet e rretheve ku shifra e të pranuarve në vit të parë me notë mesatare nën 7, është edhe mbi 50%. Nisur nga këto të dhëna, MAS është e vendosur për një politikë gjithëpërf- shirëse në bashkëpunim me drejtuesit me qëllim rritjen e cilësisë. Zbatimi i tyre pritet të hyjë në fuqi brenda këtij viti, ndërkohë që nuk janë lënë mënjanë as mësuesit në sistem, për të cilët do të ofrohen trajnime dhe kualifikime të vazhdueshme. PROBLEMATIKAT E nëse tani Ministria flet për mesataren hyrëse të studentëve që pranohen në fakultetet e mësuesisë, në dalje diskutohet kalueshmëria. Më pas, edhe arritjet në provimin për punësim që tregojnë se shumë mësues nuk janë gati për të ushtruar profesionin, për të cilin kanë studiuar në vite. “Fakti që kalueshmëria në provimin e shtetit është në ato nivele, tregon që kemi ende shumë për të ndryshuar. Fakti që kur ne bëjmë rankimin përmes portalit ‘ Mësues për Shqipërinë’ nuk kemi ato fashat që do të donim të kishim për një mësues që ka shpenzuar 5 vite në bankat e universitetit, 1 vit praktikë profesionale më pas provimin e shtetit. Nuk po i shtoj listës së argumenteve dhe faktin sesi performojnë në shkolla mësuesit tanë”, theksoi Nikolla. Të gjitha këto problematika ministrja ua parashtroi jo për të parën herë rektorëve e dekanëve të fakulteteve të edukimit, për të adresuar edhe zgjidhjen. Nikolla komunikoi edhe një sërë masash të ndërmarra për të rritur cilësinë e arsimtarëve të rinj, midis tyre rritja e mesatares së pranimit.