Veliaj takon administratorët: Zgjedhja juaj ka reduktuar problemet
Caktimi i administratorëve të pallateve, sipas kryebashkiakut Erion Veliaj ka reduktuar ndjeshëm problemet. Pas ngritjes së Task- Forcës, një vit më pas, rreth 2800 mijë pallate në Tiranë kanë zgjedhur kryesitë e tyre për administrimin e mjediseve në bashkëpronësi, ndërsa në 500 të tjera janë zgjedhur edhe administratorët. Ky i fundit mblodhi dje të zgjedhurit e rinj dhe grupin e Task- Forcës ku vlerësoi punën e tyre. “Fakti që një pjesë e madhe e këtyre problematikave kanë rënë, është një lajm shumë i mirë për qytetin”. Veç të tjerash, procesi i caktimit të administratorëve ka hapur edhe vende të reja pune, duke angazhuar persona që kishin dalë në pension ose edhe të papunë. “Më jep kënaqësi fakti se qindra vetë i kanë gjetur punë vetes, falë angazhimit të komunitetit. Janë punësuar njerëz, jo vetëm Task- Forca, por sa njerëz po punojnë si administratorë, çojnë një rrogë në shtëpi, që më përpara ose mund të kishin dalë në pension të parakohshëm ose mund të ishin të paangazhuar”, tha Veliaj. Gjatë një takimi me administratorë të zgjedhur të pallateve, Erion Veliaj u shpreh optimist për këtë proces. Ai u beri apel banoreve që ende nuk e kanë administratorin ta zgjedhin sa më shpejt, duke reduk- tuar edhe problemet në komunitet. Kryetari u ndal edhe në vendimin e fundit të Këshillit Bashkiak për krijimin e tri lagjeve të reja, duke theksuar se ato tashmë do të buxhetohen si zona më vete. “Do të duhet të bëjmë një buxhet specifik për këto lagje të reja. Në inventarin e bashkisë për zonën e Kasharit kemi 12 mijë vetë, por na rezulton nga censusi se aty jetojnë mbi 50 mijë, ndoshta edhe 80. Ama, kemi buxhetuar sikur të jenë 12 mijë. Kjo duhet rregulluar dhe krijimi i lagjeve të reja, e realizon këtë. Na mundëson të kuptojmë sa banorëve u shërbejmë dhe si t’i ndajmë investimet për frymë”.